台語文~~~鳥鼠菩薩~~~遊子2015.03.07.
頂禮拜6欲暗仔時陣，1隻鳥鼠鼻著朋友紮入來的雞排芳味，綴伊走入阮兜1樓的茨內，予我看到心內驚一下；因為遮久無予鳥鼠入來阮兜囉！雖然，附近這箍圍仔做食的店非常濟，嘛時常看到茨邊隔壁的人佮大小隻鳥鼠相鬥，即馬，換阮愛傷腦筋啦！
我先攢細塊黏鼠板2塊，中央囥寡仔好料來招待，食飽暗了後，甲巡看著，竟然看到hit4隻鳥鼠上釣啦！規身軀予麥芽膏黏著，躘來躘去，看來猶原活跳跳，才準備欲將伊趕入塑膠袋仔內，伊亦親像受到驚惶，大力一躘，唉~啊！予伊旋走無看到影囉！真正可惜！不忍心將伊先摃昏去才處理，結果是增加阮的麻煩啦！心內想講這聲慘啦！
另外準備閣較大塊的黏鼠板2塊，共款是中央囥寡仔好料來招待，不過，隔工早起來甲巡看著，哇～！這隻鳥鼠有夠巧，毋哪無上釣，伊順續放寡鳥鼠仔屎佇大塊的黏鼠板頂，予人看到嘛氣嘛o-lo2‧
黏鼠板既然無法度掠伊，只有改用別款方法來招待啦！肉鬆、雞骨仔肉等等加入番麥粒仔的藥粉，另外有藥水，又閣經過2工，猶原看到伊無分暝日，照常踅來踅去，趖來趖去，完全無將阮看佇眼內，第5暗就緊去買1跤鳥鼠籠子，鳥鼠籠子底掛著雞肉，結果隔工檢查，伊亦是真巧無上吊，有步數想到無跤路，真正毋知欲按怎樣才有效？嘛是只好繼續用肉鬆、雞骨仔肉等等加入番麥粒仔的藥粉佮有藥水；會記得以前的鳥鼠藥仔攏真毒真有效，後來為著環保佮性命安全問題，調整做毒性較低，予鳥鼠食幾工仔了後才會發揮作用，所以，只有繼續款待繼續等囉！
第7工透早，一來到1樓隨鼻到有淡薄仔臭肪味，檢查鳥鼠籠子底亦是無影無跡，就開始搬倉庫的物件，大細項攏搬出來檢查，順續整理真濟久無用的物件，分類做回收的、做糞圾的，猶原會當利用的等等，經過將近2點鐘時間，總算佇上死角的所在揣到啦！已經袂轉袂動，裝入雙層塑膠袋仔內，才開始徹底消毒環境，避免任何細菌污染著阮蹛的所在；將倉庫物件歸位，心内的驚惶佮煩惱才安心仔放落去‧
佛祖講：佇咱生活中所發生的代誌攏是有意義的，無論任何人、事、物等等，攏毋是無緣無故予咱遇到的，是按怎樣別人袂遇到？你會遇到？家己愛反省想看mai7！依照這禮拜這隻鳥鼠來阮兜的代誌來講，可能是欲提醒我佇舊曆過年前，無閒將1樓倉庫大摒掃，所以，叫我這幾工認真做啦！整理完倉庫環境有影閣較清氣，這隻鳥鼠實在講亦算是菩薩啦！
留言列表
