jimmycmlin的部落格

台語文~~~~~內灣鐵枝仔路~~~~~遊子 2009.04.18.
內灣是咱台灣真出名的懷舊風景區之一，位佇新竹縣橫山鄉的內灣村，因為內灣附近自古就是土炭佮木材的出產所在，土炭佮木材攏需要靠火車運送載出，所以佇日本統治時就起內灣鐵枝仔路；內灣火車頭嘛是內灣鐵枝仔路支線的上尾站，內灣火車頭附近自早就蹛真濟人，萊做生理的、挖土炭的，剉材的、駛木馬的、駛輕便車的、駛流籠的等等，所以，以早內灣就予人叫做”小上海”，嘛有叫做”櫻花部落”，名聲透全台灣‧
阮來內灣佚佗過未算哩擺啦！毋過，攏毋捌坐過內灣鐵枝仔路的火車，即擺綴公會閣來遊覽，因為歇睏時間有3點鐘久，附近的景緻亦熟似甲有賰，阮看到一tsua7火車入站，牽手講：咱攏毋捌坐過，緊來坐看mai7好無？阮先入去車頭問清楚車班往回的時間，算算著猶會赴倒返來集合坐車，阮就緊買內灣佮竹東間的往回車票，1個人才34箍，會使坐往回40分鐘久，實在俗啦！
內灣鐵枝仔路支線原本是內灣到新竹，全長27.9公里，佇1951年才全線通車，總共設有10車頭，有新竹、竹中、上員、榮華、竹東、橫山、九讚頭、合興、富貴、內灣是上尾站；幾年前新竹縣政府為著其他建設規劃，拍算欲廢掉內灣鐵枝仔路支線，經過內灣地方人士走tsong5拼命爭取，上尾仔才決議保留著竹東到內灣這段鐵枝仔路，火車繼續駛，予大家方便，逐家才放心；而且，後來歇睏日遊客愈來愈濟，定定嘛客滿喔！
阮歡喜上車，賰無幾個空位，好佳在猶有2位窗子邊的位通看外頭風景，上車的人愈來愈濟，火車欲起行時，2節車廂已經是tsat8統統囉！
車廂看起來新新真清氣，親像是40年前光華號的車廂，車內人客一陣一陣，逐家有講有笑，真濟看來攏是觀光客，在地人顛倒較少；沿路窗外攏是青翠的景色，有時陣佮大路同齊，遊覽車、自用車、烏都[禾黑]亦有正時行的腳踏車，踮邊仔來來去去，火車寬寬仔行，予車內的人會當慢慢仔來欣賞外面嫷風景，沿路雖然是小站，車長共款真頂真來服務，路程中lng3過3擺磅空，雖然是短短仔，嘛是趣味趣味！佇合興站算是中間較大站，落車的人較濟，月台邊仔佮車頭邊仔攏整理甲親像公園，予人看著真清爽‧半途嘛有看到細個流籠吊佇半天中，古早是運送土炭，後來起紅毛土工廠，換來運送紅毛土的原料用，這佇其他所在是真罕得看到喔！窗外的茨佮大樓愈來愈濟，原來現此時的尾仔站竹東欲到位啦！
阮綴著規車的人出站，阮要求將票尾仔保留做紀念，又閣去賣票的所在tng3印仔，印著”內灣線小站巡禮紀念‧竹東站”，心內感覺真歡喜，會記得幾仔年前，查某囝佇東部讀冊時，阮嘛去”吉安--壽豐”站tng3印仔做紀念‧
佇竹東站歇10分鐘爾爾，原班火車隨翻頭行返內灣，來時kheh甲滿滿，即陣空bong2-bong2，1個人會當坐幾仔位，車內空氣閣較好，窗外得景緻看著閣較清楚，火車亦是準時返到鬧熱滾滾的內灣站，遠遠看到排隊欲坐車的遊客比前仔閣較濟，逐家攏想欲來感受到無共旅遊的滋味‧
這擺的內灣鐵枝仔路之遊，有影真正無共款！真難得啊！