jimmycmlin的部落格

用藥保健~~~~~第2型糖尿病~~~~~遊子 2009.04.18.
媒體報導：咱台灣本土的糖尿病新藥研究開發，最近有真大的進展，因為咱國家衛生院成功研究開發新化學藥物組合的糖尿病新藥”脯基双[月生]肽[酉每]
(DPP-IV)抑制劑，會使增加第2型糖尿病患者對胰島素的敏感度，來降低體內血糖的濃度‧暫時代號叫做”DBPR108”‧什麼是第2型糖尿病呢？
咱一般所講的糖尿病分做：第1型糖尿病佮第2型糖尿病‧如果腰尺無法度分泌出胰島素亦是分泌量真少，醫學上叫做：胰島素依賴型糖尿病，嘛叫做第1型糖尿病‧一般發生佇細漢囡仔佮少年囡仔較濟，總比率大約佔所有糖尿病的5%‧
如果腰尺會當分泌製造出胰島素，但是伊的身體對家己的胰島素出現阻抗，抑是，敏感度無夠，會引起自身的胰島素分泌不足，這種叫做：非胰島素依賴型糖尿病，嘛叫做第2型糖尿病‧總比率大約佔所有糖尿病的95%以上‧
咱日常所食的糖份佮五穀類的澱粉質，經過腸子的消化就轉為葡萄糖，閣透過體內胰島素來幫助葡萄糖入去血內循環，又閣轉入去筋肉亦是其他組織，提供為咱身體能量的來源‧所以，第2型糖尿病的患者如果無法度用運動佮飲食來控制血糖時，就需要以用食的降血糖藥物亦是注射的胰島素來控制。