jimmycmlin的部落格

用藥保健~~~~~鼻膏倒流~~~~~遊子 2009.04.22.
最近氣候變化無常，有人一直嗽未停，日亦嗽暝亦嗽，醫生館去幾仔擺，猶原無精差，莫怪人講：塗水師驚掠漏，醫生驚治嗽‧根據台中榮總肺部內科醫生，針對50外位連續咳嗽超過8禮拜，毋是感冒，亦無pok菸，咳嗽病因不明的患者進行研究，發現竟然有7成的患者，干哪是鼻膏倒流引起長期連續嗽‧
鼻膏倒流到底是什麼情形呢？
鼻膏倒流是指鼻水的量變成較濟、較黏、較ko2，親像糊仔膏膏，其實亦毋是真正倒流，因為患者佇日時會使將鼻膏tshing3出來，亦是倒抽吞入腹內，毋過，佇暗暝睏的時，因為倒著睏去，無法度將鼻膏咳出來phui3掉，亦是倒抽吞入腹內，親像糊仔膏膏黏黏的鼻膏，寬寬仔流徙去嚨喉頭佮肺管的所在，當然會刺激嚨喉頭佮肺管，續落引起無停的連續嗽‧
有的患者每到暗暝睏的時，特別嗽著閣較厲害，有時嗽未停強欲蝦龜喘，這種情形有可能是鼻竇炎等的鼻子症頭無治療好所引起的嗽‧
當然平時的保健習慣真要緊，較倢洗手，加飲寡仔燒滾水，對止嗽化痰攏真有幫助；連續咳嗽超過幾仔工，上好亦是愛去看醫生才對啦！