(世界日夜圖會當看到日夜線)
台語文~~~~~2009東歐遊記(1)~~~~~遊子 2009.05.15.
俗語講：光陰似箭，一去不回頭‧毋過，自從飛機發明以後，這句俗語就無一定對啦！
尤其時常坐長途飛機的人來講，時常嘛拄到時差的問題，經過10外點鐘的飛行，有可
能手錶仔的時間愛調倒轉去，亦有可能又閣倒返去昨昏得日子，所以講時間會當倒返
去啦！並毋是一去不回頭！話講倒返來，亦會出現今仔日的時間，無偌久就跳去明仔
載啦！這是即擺由桃園國際機場飛往東歐維也納時，佇飛機內看到電視放出世界日夜
圖的感想，佇太平洋中間設定做換日線，世界日夜圖會當看到日夜線，綴著時間的推
移來變化，原本飛佇萬米懸的天尾頂，日頭真燄，服務員攏勸人將窗子扭落來，一飛
過日夜線，外頭隨變成暗mih8-摸，實在真奇怪閣趣味！雖然，這攏是科技進步佮人
為訂出來的規則，全世界亦攏公認佮慣勢啦！所以講：俗語雖然是前人生活智慧的累
積‧毋過，猶原會綴著時代環境的改變，出現無共款的解說‧親像飛機的發明，予時
間會當倒返去啦！
台北101是目前世界上懸的摩天大樓，原本明年會予中東杜拜的摩天大樓拼過，毋過
，這次佇阿布達比(ABHUDABI)歇睏2點鐘，一陣由菲律賓來桃園國際機場轉機的人落
飛機，準備欲轉去杜拜做穡，才知影舊年全世界的金融滾絞龍，嘛予杜拜的摩天大樓
進度受到真大的影響，明年絕對無法度完工，所以，咱台灣的台北101猶原會當繼續
做全世界上懸的摩天大樓啦！
(阿布達比機場內)
聽講今年6月以後，往東歐維也納改做直飛，所以，這次佇阿布達比(ABHUDABI)歇睏
嘛算是難得的機會，雖然只是踮佇機場內，嘛是會當稍可仔瞭解回教國家民族的風俗
習慣；看到查某人圍甲密密密，賰兩蕊目睭通看爾爾，亦看到真大間的祈禱室，因為
回教信徒1工愛祈禱幾仔擺，閣跪拜、趴著拜，查埔人留兩phiat喙鬚，看板、紙票、
銀角仔攏是阿拉伯文，一屑仔嘛看攏無，機場內的賣店人無濟，可能是半瞑的關係‧
雖然是半瞑，外頭的溫度猶有30度喔！抑是日時可能達到40度以上，有影會熱死人啊
！比較起來，咱台灣亦是較好啦！
留言列表
