台語文~~東歐遊記~奧地利(2)－jimmycmlin的部落格

(熊布朗宮後壁面)
台語文~~~~~東歐遊記~奧地利(2)~~~~~遊子 20090516
台灣暗時的飛機，雖然，飛了15點外鐘，因為時差6點鐘，來到奧地利
的維也納機場才隔工透早8點爾爾，外頭10外度仔的溫度，無日頭的所
在會感覺淡薄仔冷冷，空氣佮街仔路予人感覺真清氣，第一印象袂
[禾黑]啦！

(双頭鷹雕像是帝國的象徵)
熊布朗宮(Schonbrunn)規模真宏偉，佇1996年予聯合國教科文組織
收列入為世界文化遺產；自早歐洲皇宮的設計大概是共一個模式，正
門入來是大廣埕，噴水池、樹蔭、石板路等等，中央是皇宮的主體建
築物，有4層樓仔懸，又閣闊面，表現出奧地利洛可可式的建築風格，
予人感覺著奧匈帝國的華麗佮真正氣派‧皇宮的後面又是一座大花園
，現此時是春天，七彩的花草真嫷，双爿企著規排大座的雕像，每一
座的雕像有無共的故事，雖然，毋是像凡爾賽宮用大理石雕刻的，嘛
是真頂真；噴水池比頭前大廣埕的閣較大，續落一片山坪，山坪邊仔
的動物園是古早皇宮內教育囡仔用的，上山坪頂看過去，規個維也納
市區攏入目睭底，尖尖的教堂、彩色的茨尾頂、藍色的天，構成真嫷
的畫面‧雖然，熊布朗宮規模真宏偉亦真嫷，毋過，佮法國巴黎的凡
爾賽宮比起來，猶是稍可仔輸啦！3年前去凡爾賽宮時，嘛有入去參
觀法國皇室留落來的物件，看著真寶貴、真稀罕！佇歐洲的皇宮攏已
經開放做觀光的好所在，由世界逐位來遊覽的人真正濟，亦算拼經濟
啦！

(整修中的聖史蒂芬大教堂)
真善美(The Sound of Music)這齣電影留傳到今，毋哪音樂好聽，
故事予人感動，拍片背景的嫷景色亦予人真欣羨；隔工行程走300外
公里路，先到湖區享受鳟魚風味餐，續落到世界文化遺產城市的莎姿
堡(Sulzburg)，就是真善美電影拍片背景嫷景色的所在，有機會親
身浸入電影的背景~米拉貝爾花園，是電影中高音歌曲DoReMi的場景
，一區一區花草造景嫷甲無法度講，逐家攏非常歡喜，提著相機互相
拼性命hip，準備返去好好仔整理，才慢慢仔來懷念欣賞‧

(米拉貝爾花園內一景)
後來去天才音樂神童莫札特以前蹛的茨參觀，連伊阿母的茨嘛攏改為
古蹟趁觀光客的錢；毋哪按呢，感覺奧地利全國攏靠莫札特食穿，只
要佮莫札特有牽連的大細項物件，攏會使吸引觀光客來趁錢，以巧克
力來講，用莫札特的人頭做看板，就有10外種無共造型佮包裝，無論
大城市亦是莊腳所在，百貨公司大飯店亦是細間店仔，攏嘛看會到，
滿滿是啦！感覺親像咱台灣的黃XX大溪豆乾、台中XX堂太陽餅，只是
咱算地方的名產，伊是全國性的名產；因為自由競選價數無一定，有
時差欲規倍喔！買的時目睭亦愛撥予金‧每年辦莫札特的紀錄音樂會
佮相關活動，超過200年啦！一個人往生後對後代囝孫的蒂蔭會當繼
續200外年，猶是愈來愈旺，實在真正予人想未到啊！