jimmycmlin的部落格

台語文~~~~~東歐遊記~奧地利(3)~~~~~遊子 2009.05.17.
鹽是真重要的民生用品，咱台灣自早南部沿海的鹽田曝鹽是真重要的資源，
現此時的七股鹽山佮通霄鹽山是開放為觀光遊覽教育用；雖然，奧地利四面
無倚海，猶原有出產真濟鹽，自古羅馬帝國開始，佇地下30~40公尺深的鹽
礦就是非常寶貴的資產，今仔日雖然愛自費參加，亦是毋通錯過這個難得的
機會‧

欲到鹽礦區的路途，看到一大陣穿著真整齊的傳統衫仔褲、連身群的教友，
上頭前是教會神職人員，夯著十字架tshua7路，教友查埔、查某、老人、
囡仔攏有，，以前親像佇電視節目看過，即陣是當場看到，雖然，宗教信仰
無共，嘛感受到[人因]虔誠和諧的氣氛‧

來到鹽礦坑口是上早頭批的遊客，入坑內進前，每人攏愛先套白色的防塵服
裝，續落坐輕便仔慢慢仔tshu入鹽礦坑內，坑內双爿壁頂有電火，袂講看攏
無，坑內不哩阿闊，比起越南拍美國時的地道好真濟啦！比起金門太武山的
磅空，各有千秋，太武山的坑道會使行軍用大卡車，真濟倉庫辦公室，上寬
闊的廳會當坐500人，規模閣較大；鹽礦坑內亦是有真濟大細無共的空間，
上寬闊的廳會當坐300人左右，愛tshu滑溜2擺，1擺是28公尺長，1擺是42
公尺長，落到上深的坑仔底，tshu滑溜時2人1組，有淡薄仔驚驚，嘛真趣味
、真好耍‧坑底亦有一個鹽水池，有百外米闊，遊客是坐柴做的排仔過去對
岸，鹽水池內暗bong-bong，四箍輪轉有彩色的電火閃sih，恬靜的烏暗中
感覺袂[禾黑]啦！無共深度的的坑內，不時看到無整理的磅空，he應該嘛是
古早採鹽的坑道‧佇磅空內真正是冬暖夏涼喔！因為規年透天一直保持著10
度左右的溫度；會記得以前佇金門做兵時，聽講蹛佇太武山的磅空內，寒天
燒hong7-hong7攏袂寒，熱天雖然涼，毋過，棉被攏tam5漉漉‧

佇坑內沿途有導覽員一站一站做頂真的說明，嘛有放以前皇帝佮教會大主教
，因為鹽礦坑所引起的歷史影片，說明用英語，影片講德語，親像鴨子聽雷
啦！佳在，沿途的展示點嘛攏有逐種佮採礦相關的模型、圖片、過去的實物
等等，半看仔半臆，對鹽礦坑的歷史佮伊過去的貢獻，加減有稍可仔瞭解‧
俗語講：行萬里路，勝過讀萬卷冊‧實在無毋對啊！咱知影有海鹽、中國四
川自貢井鹽、地面佮地下的岩鹽等等，冊寫是一回事，會當親身看到、接觸
到，又是稀罕的經驗啊！

中晝佇目前歐洲所賰唯一台灣人開的餐廳食飯，過去真濟香港人佮台灣人開
的餐廳、咖啡店仔、雜貨店仔等等，已經攏予移民的中國人頂了了啦！這間
餐廳頭家是嘉義人，聽講過2年仔嘛欲退休囉！頭家看到故鄉來的鄉親，有講
有笑，烏龍茶、菜埔卵、燒酒雞、爌肉、炒金針----，攏是真正故鄉的口味
，會當佇國外食到實在福氣啦！食飽後頭家特別放卡拉OK，尤其是台語老歌
，頭家嘛佮逐家同齊大聲歡喜唱，攏無走音，表示頭家平常時有練喔！因為
趕時間關係，逐家佇毋甘氣氛中繼續往下午的行程‧有影是難忘的中晝頓啊！