台語文~~~~~東歐遊記~捷克(4)~~~~~遊子 2009.05.18.
由高速公路經過奧地利佮捷克的界址，因為歐盟統合關係，有參加歐盟的國家
佮國家間的界址無閣設海關，自由通行來來去去，外國人只要有其中任何一個
歐盟國家的有效簽證，共款會使自由通行來去想欲去的所在，實在省錢省事啦
！有影是：天下事合久必分，分久必合‧歷史就是在分分合合中繼續佇進行啦
！趣味的是：人類佇歷史中的教訓就是無法度學到教訓‧
過界址後無偌久就斡入去一般道路，道路的品質、民家茨的設計外觀、環境等
等，感覺佮奧地利有稍可仔精差，因為捷克是由共產國家轉變加入歐盟，公共
建設才慢慢仔加強中，佇共產時代，引入寡仔北越的人，後來落地生根留落來
繼續生湠拍拼，所以，越南人漸漸是佇捷克中國人上大的競爭者‧
微微仔雨中來到亦是世界文化遺產的庫倫洛夫小鎮(Cesky Krumlov)，親像
行入中古世紀的感覺；先行入城堡去參觀，倚山坪起的城堡實在有夠大，有護
城河、大石板起的城牆，看來無輸中國的萬里長城，上中央是堡主蹛的所在，
中箍是保護堡主的官僚軍隊人員等，上外箍是一般百姓生活的所在，一個城堡
會使飼養真濟人，親像封地做王共款，古早歐洲的歷史就是城堡佮城堡間的戰
爭，拍贏的堡主愈管愈濟城堡，其實佮中國日本的歷史差不多啦！
插上天頂的高塔是這個城堡上懸、上古早建築物之一，peh去147層樓梯的上
頂懸，會當看到遠遠遠，古早戰爭時是真好觀察的重要所在，以保護城堡來講
無伊袂用哩！高塔雖然開放觀光遊覽，毋過，為著保護古蹟，攏有控制人數；
由城堡的建築物佮留落來的用品，蹛佇堡內的人生活不哩富裕；舊城區的街仔
路攏是紀念品店較濟，會當看到真濟波希米亞的水晶、瓷仔、柴雕刻藝品等等
，是真有特色的物件‧
欲暗時來到生產百威麥子酒的原始故鄉布達喬維治(Cesky Budejovice)，隔
工透早去百威麥子酒工廠參觀，導覽員詳細紹介百威麥子酒的發展歷史佮特別
的製造方法，續落去現場參觀，入去2度的冷氣庫內[口林]上鮮的麥子酒，無
限量，隨人歡喜[口林]甲飽‧口味其實佮咱公賣局的”尚青”差不多啦！
繼續來到有中世紀寶石之稱的布拉格(Prague)，伊是支票之國捷克的首都，
Czech的發音佮英語的Check真倚，所以，予人將Czech Republic叫做
Check Republic，華語就是支票共和國囉！布拉格城市有600外年的歷史，
目前分做新城區、舊城區、古堡區、高堡區等等，因為懸的鐘樓、哥德式的尖
塔教堂、巴洛克式的城堡真濟，所以，亦予人稱做百塔之城；聖維特大教堂是
布拉格城堡上重要的地標，教堂內窗子的彩色玻璃，攏是藝術家慕夏的作品，
予這座千年歷史的教堂增加袂少現代感；舊城區的廣場觀光客滿滿是，街頭藝
人、音樂會、料理店、精品店、紀念品店等等，規工鬧熱滾滾，日時暗時的景
緻無共，日頭落山後，燈火拍上懸懸的塔樓頂，規個廣場閣較嫷！一直到半瞑
翻點猶是真鬧熱，親像不夜城，尤其佇歐洲人的習慣，
有夜生活的都市真少，布拉格的夜生活算是真特別的喔！
舊城區廣場的提恩教堂是屬於哥德式的双尖塔型建築物，企佇廣場的任何壁角
攏一定看會到伊，無分日時暗時攏非常影目！佇舊市政廳外壁的天文鐘
(Astronomical)，嘛是上受遊客o-lo2的觀光點，上下跤的大時鐘是標示
12星座(Astrologic)；中央的大時鐘的上外箍是標示24點鐘，內箍是標示
60分鐘；上頂仔是目前逐家所用的時鐘，伊的双爿有2個窗子，每拄到整點時
，除了有大聲的報時音樂鐘聲以外，双爿的窗子會拍開，1爿的窗子內有6個柴
翁仔徙轉動，in是耶穌的12位門徒，1爿6位表示好的意義，另外1爿6位表示
歹的意義，有對世人的警惕作用；每擺拄到整點前仔幾分鐘時，前仔廣場的遊
客漸漸增加擠甲滿滿滿，無分日時暗時，無分國籍，無分查埔查某，無分大人
囡仔，逐家攏嘛頭夯懸懸看双爿的窗子，準備欣賞整點時的表演，真濟人提相
機、攝影機拍落來做紀念‧親身在場感受到即款氣氛，實在真難得又閣真趣味‧
後來逐家去俗拼買物件時，干哪阮2翁仔某買票peh上起佇1338年有近700年歷
史的天文鐘樓上頂頭層，由69米半的頂懸看過去，布拉格城內茨頂的景緻又是
另外一樣無共的感覺，真正嫷甲無法度講出來，下面廣場的遊客親像狗蟻共款
，大型雕像嘛親像番仔火盒爾爾，對面的提恩教堂感覺閣較倚近，遠遠的城堡、
溪流、双尖塔型教堂茨頂，變成另外一幅圖！旅遊就是愛有這款佮咱國內無共
的享受才有價值啦！
留言列表
