新聞辭典~~~~~罄竹難書~~~~~遊子 2006.05.23.
今年5月20日，阿扁仔總統參加志工活動，講著所有志工為咱台灣國家社會做真正濟有意義、
有幫助的事誌，有影是”罄竹難書”啦！
為著一句”罄竹難書”的俗諺，阿扁仔總統和教育部長分別予汎藍媒體和汎藍立法委員釘甲歸
粒頭攏全苞，到底是阿扁仔總統和教育部長毋bhat字？抑是汎藍媒體和汎藍立法委員毋bhat
字？無讀冊？
咱來看”罄竹難書”這詞尚早出現在”呂氏春秋”，伊寫著：此皆亂國之所生也，不能勝數，
盡荊越之竹猶不能書。是在形容當時天下逐國災難異像非常濟，親像：天頂的雲彩出現怪異形
狀、日頭予天狗食去(即馬叫日蝕)、同齊出現4粒月娘、馬的頭殼頂發角等等，奇怪無正常的
現象；攏是當時政治敗壞所帶來的亂亡徵兆，濟到用所有荊、越兩地出產的竹子嘛寫未完，記
載未完的意思‧
另外，在”舊唐書”卷第53的李密傳，是寫著：罄南山之竹，書罪未窮；決東海之波，流惡難
盡。伊是用”罄竹難書”來表示罪狀之多，難以寫盡‧
不過，猶有唐朝”皮日休文集”第9卷內有1篇”移元徵君書”中，有寫著“果行其道，罄南山
之竹，不足以書足下之功”的文句；這是皮日休為著欲規勸歸隱山林的元姓友人，重新來為社
會世人服務，形容用所有南山的竹子，嘛無法度寫完這位友人會當為社會世人做出的貢獻。這
是真正面的肯定描述‧
由前仔古冊的例來看，咱實在毋通”食古不化”，只知其一不知其二‧話語用詞是活的，因為
時空環境無共，自然有無共意思的引用和解說，咱愛多多瞭解文字話語用詞無共的意涵，看任
何事誌的眼界和心胸肚量的包容度才會當復卡大、復卡闊‧
所以講：在即馬電腦科技發達的時代，”罄竹難書”其實就是用卡濟的CD片亦是記憶體，嘛無
法度完全記錄落來的意思啦！欲記錄的內容是好事？歹事？是操作人的事誌啦！”記錄的內容”
和”罄竹難書”絕對是兩項事誌，互相無相關的‧
全站熱搜
留言列表
