台語文~~東歐遊記~捷克(5)－jimmycmlin的部落格

(捷運月台車欲進站)
台語文~~~~~東歐遊記~捷克(5)~~~~~遊子 2009.05.22.
歐洲人真老實戇直，政府對人民的政策亦是以信任為出發點，這佇使用
公共交通工具會使驗證著‧因為徙街到正10點，布拉格的夜生活猶原鬧
熱滾滾，阮一陣10個人亦是愛返去旅館啦！想講坐計程車真貴，附近就
有捷運站，德國仔領隊建議逐家坐捷運返旅館，阮當然非常歡喜，綴團
出遊會使坐到當地的捷運，實在真難得啊！
行落地下捷運站，初初感覺佮台北市差不多，只是咱台北市的環境閣較
明亮清氣；買票完全是自動賣票機，說明攏是捷克文，另外有德文佮英
文，逐家攏無克朗的銀角仔，台灣領隊講：好佳在，服務窗子口猶有人
，我來央伊幫忙買票換銀角仔‧想未到窗子內的服務人員講：伊無賣票
嘛下班啦！無法度換銀角仔‧台灣領隊千拜託萬拜託講：阮一陣10個人
無銀角仔通買車票！服務人員ko-pu5-ji7-將換1人份的銀角仔爾爾‧
毋就是毋啦！逐家規陣憨佇hia‧
後來，德國仔領隊講：行啦！逐家做伙行過捷運站內入口，耶~~!攏無
驗收票員，亦無像台北市的自動驗票機，逐家大-pan7-大-pan7行入到
月台邊等車，心內稍可仔驚惶不安，無買票坐車總是毋對啦！想講是毋
是上車後才來補票？抑無，到站後佇出口才補票？
想到按呢，咱台北市的設計較先進閣人性化，車站服務人員態度嘛較親
切、較有笑容、較好！毋過，存心刁工欲走票的人猶原有‧
車箱算是清氣清氣，暗暝10點外在地人猶未少，雖然，只有坐短短仔4站
爾爾，車內看板攏是捷克文，看攏無，毋過，佇車內逐家歡喜甲講未煞；
到站落車囉！德國仔領隊行上頭前，亦是大-pan7-大-pan7行出站，猶
原無驗收票員佮自動驗票機，前仔窗子內服務人員的戇直，才予阮一陣
10個人變成坐霸王車！雖然是無法度造成的，實在真歹勢啦！想講如果
坐霸王車的旅客濟，in的捷運公司甘有法度繼續經營落去？可能in的人
民有影攏真老實、真戇直、未走票啦！這嘛是咱愛學的所在，才會當提
升公共道德心佮責任感‧