(大片閣嫷的油菜花田)
台語文~~~~~東歐遊記~捷克佮德國(6)~~~~~遊子 2009.05.22.
離開百塔之城的布拉格，沿路是一大片一大片清黃的油菜花田，因為歐洲
國家的土地攏是1年種植1擺爾爾，其他時間政府鼓勵逐家種油菜花，一方
面是改變環境的色彩景緻，另外一方面是會使做土地的肥料，好好仔養地
，予每年的農作物免落真濟肥料佮農藥，親像咱所講的有機種做，實在真
有環保概念‧這佇咱拍拼台灣人的想法，感到1年種植1擺真無採啦！任何
事誌有1好無2好，咱台灣的土地過度利用，化學肥佮農藥愈下愈重，上尾
仔破壞大地環境，倒頭來是咱受害啦！司機真搭心，揣一個稍可仔較闊的
路邊停落來，予逐家行入難忘的油菜花田內，盡量hip相做紀念，雖然是
短短仔時間，逐家攏真感謝司機的體貼，因為這尼阿大片閣嫷的菜花田，
佇咱台灣是無機會欣賞到啦！
(溫泉鄉阮蹛的旅館)
進入溫泉鄉的瑪麗安斯凱蘭澤(Marianske Lazne)，雖然是小小的所在
，毋過，每棟建築物攏有無共的特色，規個小鎮就是一個大花園，中央一
個真大的噴水池，有時大港、有時細港，有時噴懸、有時噴低，輪流變化
；佇咱台灣佮日本的溫泉鄉攏是洗溫泉，華語講泡湯，佇遮予逐家臆看
mai7？遮的溫泉使用有什麼無共？遮的溫泉是用[口林]的啦！
來到溫泉博物館，有真濟親像飲水機的水道頭，予人lau3溫泉水來[口林]
，有2種無共的口味，看in外國人攏去買專用的溫泉杯來[口林]，[口林]
完將溫泉杯紮返去做紀念；前仔導遊有交代，抑是欲省錢，會記得帶旅館
的玻璃杯來[口林]就會用哩啦！咱台灣較儉，規團無人開錢去買專用的溫
泉杯，會省加減省‧溫泉水清清仔，鼻是無味，入喙底才有感覺佮一般清
水無共，可能是礦物質較濟啦！雖然傳說講[口林]溫泉水會當預防並症，
逐家亦是[口林]淡薄仔意思意思！無人敢[口林]傷濟，表示有來遮試過就
是啦！
(專用的溫泉杯)
今仔日是禮拜日，規街仔無1間店有開門營業，除了旅館佮飯店，真無簡單
揣到1間營業到暗時10點的大賣場，阮2對翁仔某就入去徙徙看看，感覺佮
咱台灣的大賣場差不多啦！物件種類亦算袂少，加減買寡果子、麥子酒佮
欲做扮手的物件，結數時用歐元嘛會通，1歐元算做26.2克朗，猶算是公
道啦！大賣場的價數亦是有較俗‧即擺有機會家己揣到大賣場通徙，稍可
仔親像自由行，嘛算未[禾黑]啦！
(旅遊中上低溫度)
隔工續落進入德國，行往有德國小威尼斯之稱的千年古城”班堡”
(Bamburg)，佇1993年列入世界文化遺產名單，閃過2擺世界大戰的破壞
，完整保留著古都的風情，著嘛是歷任主教所蹛的所在，共款是舊皇宮、
哥德式教堂佮城堡；續落來到德國300外公里羅曼蒂克大道上北爿的烏茲堡
(Wurzburg)，對岸就是古早重要的戰略城堡瑪利安堡(Marianburg)，附
近攏是做葡萄酒的葡萄園，主教宮是予遊客印象真深的巴洛克式建築物的
代表，佇1981年確認列入聯合國教科文組織的世界人類遺產；欲暗時來到
歐洲第三大無閒的機場~法蘭克福(Frankfurt)‧
(班堡景緻之一葡萄園)
全站熱搜
留言列表
