莊子講(69)~~~大盜的大道理~~~遊子
柳下季是孔子的朋友，伊的小弟叫做盜(足石)，盜(足石)帶領部眾有九千人，橫霸社會天下，無所不做，
真濟人聽到就驚‧
有1工，孔子就對柳下季講：做父母的要管教囝兒，做兄哥的要管教小弟，即馬，你的小弟做大盜，橫霸
天下，你甘﹝勿會﹞當來管教伊？
柳下季應講：有的人就是毋聽父兄的管教，又有什麼辦法啊！
孔子聽到講：好啦！由我去勸伊看mai！
柳下季好心應講：我hit個小弟非常倔強，如果有人拂逆伊，伊會真生氣暴怒，我看你上好﹝勿愛﹞去卡
好喔！
孔子毋聽，就揣子貢和顏回做伙，同齊上山去會見盜(足石)‧
下手人看到孔子一陣人欲到囉！就去報告講：大王，大王，孔子一陣人上山來囉！想欲和大王見面‧
盜(足石)聽到就大聲喝講：恁替我傳話予伊，叫伊毋通復妄稱文武，搬弄是非，迷惑天下君主‧毋通復
假借孝悌，欺騙士人僥倖得到封侯的富貴‧伊的罪孽實在深重，叫伊趁早落山返去猶會赴‧抑無，我就將
伊的心肝提來做中晝頓食啦！
下手人聽到隨走干哪飛去向孔子一陣人講：阮大王無想欲見恁，恁趕緊走‧
孔子聽到講：我是柳下季的好朋友，聽講大王是重義的人，特別來拜訪你‧
盜(足石)聽到就喝講：丘！有話緊講，如果有無何我意，你就免想欲落山啦！
孔子輕聲仔講：天下有3種美質，第一種是：身材高大，美好無双‧第二種是：智慧包羅天下，會當分辨
萬事萬物的道理‧第三種是：勇敢果決，會當聚集群眾，率領兵卒‧照即馬來看，大王是一身兼具這三種
美質，不過，來做大盜，是毋是真無採？真可惜？大王如果願意聽看我的淺見，我願意去說服諸國，請in
為大王你來起一座大城，尊你為諸侯，你就﹝勿愛﹞復做大盜啦！
盜(足石)聽完就大聲笑講：一個人如果會當用利祿去引誘、規勸的，攏是一寡仔凡夫俗子爾爾‧想欲用富
貴來引誘我，我甘毋知影富貴只是親像眼前的雲煙共款爾爾？堯舜擁有天下過，in的囝孫即馬在叨位？湯
武嘛擁有天下過，in的囝孫即馬又在叨位？天下的事誌，有大利就一定有大害‧即馬我做大盜﹝台刂﹞人
是有限的，如果予我做諸侯，假借仁義去﹝台刂﹞人，甘毋是變成禍患無窮啦？今仔日你所講的道理，攏
是我放棄無愛的謬論，離大道傷過遠去啦！
孔子聽完無意無意恬恬仔返去‧
柳下季看到講：我的小弟是毋是有來冒犯著你？
孔子講：唉！我雄雄狂狂想欲挽虎鬚，差一點仔去予虎食落腹去‧唉啊！
所以講：孔子是有心欲推行仁義的政策，毋是欲欺騙社會天下；但是，實際上所有的政治統治者，有若濟
罪惡是假借仁義的名義來做惡的？受傷害的百姓復卡濟、歹算啦！
留言列表
