jimmycmlin的部落格

莊子講(70)~~~莊子三劍~~~遊子
趙文王真愛劍術，逐所在的劍客攏流浪遷徙來趙國，宮廷內的劍客上濟時達到三千外人‧趙王每工叫in比
劍，比甲無暝無日，毋知死傷若濟人，但是，趙王共款樂暢無想欲予in歇睏‧邊仔的諸侯看到趙王沉迷在
劍術，就想欲篡奪趙國的土地，太子知影諸侯的野心，心內非常著急煩惱憂心‧
太子的下跤手就向太子講：有1個人會當去勸阻大王‧
太子聽到真歡喜，隨問講：是什麼人有才調？
下跤手人應講：就是莊子啦！
莊子來到太子的面前講：聽講太子對大王沉迷在劍術真煩惱頭大？予我去拜見大王啦！
太子講：好是好，不過，現此時大王除了劍客以外，攏無欲見其他任何人啊！
莊子應講：這簡單啦！無問題，我的劍術嘛有兩步七仔喔！
太子講：大王所甲意的劍客差不多攏是頭毛亂七八糟，講話大聲粗魯，兩蕊目睭大大蕊、金熠熠，予人看
到會起狂；先生你看起來赫尼阿斯文、像讀冊人的款---‧
莊子應講：按呢，你就替我做一套仔劍客穿的衫仔褲予我‧


後來，莊子來到大王的面前拜見大王‧
大王看到講：你的劍術甘有影真正讚？亦無，敢勞動太子來為你引見？
莊子心平氣和應講：我的劍術在千里之內是無人會當和我比的啦！如果有人毋信欲來挑戰，十步之內我就
殺人‧
大王聽到講：按呢，你是天下無對手，天下無敵囉？
莊子穩穩仔說明講：ghau擊劍的人，是會刁故意露出破綻，來引誘對手來出招，在對手一劍刺來的時，我
已經是意在劍先；劍身合一，劍出像風，只要一出手，對手無一個無倒落去‧大王如果想欲一開眼界來親
眼看到，就請予我來試劍啦！
大王聽了講：無啦！無啦！你的劍術實在傷懸囉！7工後我才正式請你來參加比劍大會‧
在這7工內，趙王叫所飼養的劍客來比劍，造成死傷幾仔十人，上尾仔才選擇出5~6個劍術高深的高手，準
備和莊子大比一場‧

預定的日子到囉！大王對莊子講：今仔日就請你來參加比劍，好麼？
莊子恬靜仔應講：啊！我已經等候真久啦！
大王聽了講：無知你欲用若長的劍？
莊子應講：我用的劍長短隨意，但是，我有攢三種無共的劍，就是：天子之劍，諸侯之劍，庶人之劍；請
大王來選擇，選好我就來比劍‧
大王聽了真奇怪，就問講：什麼是天子之劍？
莊子微微仔笑應講：天子之劍是用燕豁、石城做尖尖的劍鋒，用齊國泰山做劍錂，以晉國、魏國做劍刃，
以周和宋地做劍環，以韓國、魏國做劍柄，以渤海做劍穗，以四夷做劍鞘‧這支劍扭出時，向頂仔會當剖
開浮雲，向下會當斬斷地根，予天下人無人不服‧這就叫做天子之劍‧
大王聽了續落去問講：什麼又是諸侯之劍？
莊子繼續應講：諸侯之劍是用豪傑的人做劍柄，用忠聖的人做劍環，用賢良的人做劍刃，用清廉的人做劍
錂，用聰明勇敢的人做劍鋒‧這支劍出手時，四境臣服，親像雷霆威震四方‧這就叫做諸侯之劍‧
大王聽了續尾仔問講：按呢，什麼又是庶人之劍？
莊子應講：庶人之劍就是頭毛亂七八糟，講話大聲粗魯，聽到真無格，兩蕊目睭大大蕊、金熠熠，比劍時
頭盔蓋著低低低，目睭像死魚仔共款，予人看到會起狂；這種劍出手時，頂仔斬對手的頭殼，對下只有刺
對手的心頭，看起來和相拍雞仔相鬥共款，如果輸去，性命無去，對國家社會連一點仔奉獻嘛無，像糞圾
啦！即馬，看大王干哪喜愛庶人之劍，我認為實在真可惜啊！


大王聽了面仔青損損，大粒汗細粒滴，就當場喝講：今仔日的比劍大會取消啦！恁攏退落去！唉！唉！唉！
莊子看到細聲仔講：大王請定心平靜，請坐‧有關劍術的事誌我講完囉！告辭啦！
大王對莊子一拜再拜說謝講：多謝先生你的指點，開通著我的無知‧
自此以後，趙王攏無復談劍術，連續3個月無踏出宮廷一步‧彼的所飼養的劍客因為趙王無復重視in，想
﹝勿會﹞開無欲改途的人，隨個仔拔劍自殺了結啦！
所以講：在世俗社會生活中的”利器”真正濟，酒、色、賭、財利、名位、權力等等無時不在，引誘你我
咱逐個人，親像最近予人挖出的逐種弊案，就是離﹝勿會﹞開遮的範圍；文章內的劍術嘛算是其中一種，
小道傷身，無什麼通見怪啦！