jimmycmlin的部落格

莊子講(68)~~~子貢雪白的衫仔~~~遊子
原憲和子貢攏是孔子的徒生‧原憲一直攏蹛在魯國的細間低茨仔，茨頂會漏雨，
門窗關﹝勿會﹞密，茨內無什麼家具，生活艱苦，不過，伊攏感覺無要緊，每工
猶原樂暢、快樂過日子‧
子貢口才好、手段懸，在官府做大官，平時就表現出真風神、驕傲的外表‧
有1工，子貢坐著大馬車去看原憲‧
身邊下跤手人來報告講：主人啊！頭前的巷子傷細條，馬車無法度入去啦！
子貢只好落車，行到原憲的茨門口‧
一見面就講：唉啊！你共款赫尼阿散食，是毋是有什麼病啊？
原憲應講：我過著真好阿！我有聽過先生教示講“無財叫做貧，學的本事無法度
發揮、做出對社會國家有幫助的事誌，叫做病‧”所以，我現此時算是貧啦！並
無什麼病啊！當然，1個人傷過頭散食雖然是毋好，但是為了迎合世俗風氣，就
放棄原本的理想，借著仁義的名，攏做一寡仔歹事誌，即種人準做身軀穿著親像
你所穿赫尼阿雪白的衫仔，暗時睏的時陣，心內甘會安啊？我是不忍心按呢做，
我亦是認為安心過艱苦的日子較好‧
所以講：外表穿著真雪白、鮮艷的衫仔，並無一定表示伊的內心和所做所為攏是
共款清白的喔！喙喝仁義道德，做的攏是傷天害理的事，按呢得到榮華富貴，做
大官，賺大錢，實在比﹝勿會﹞著安貧樂道，為人處事真正當，精神上真快樂，
但是生活艱苦的人‧