台語文~~~~~2006美西探親旅遊記(1)~~~~~遊子
老友Eric san轉來台灣3個月，陪伴伊的老父在復興鄉三民，一目﹝目聶﹞又愛轉去美國洛杉磯囉‧
在送別餐會中，大兄大嫂講：翁仔某會當同齊出去遊覽是真難得啊！尤其愛趁健康行會動才好‧所以
，予阮老翁仔某稍可仔悟著，隔工就上網揣美西的行程，嘛隨入去美國在台協會(AIT)做網上寫簽證
申請表，預約簽證面會(Interview)時間‧提出新的護照和舊的護照，一比較才感覺新的護照為著加
印”TAIWAN”，是咱台灣人經過拍拼，政黨輪替後才有法度行出的一小步，雖然猶未滿意，總是會當
予台灣人接受，在國際上予別人真明確認知台灣(Taiwan)和中國(China)是無共啦！亦無，只有ROC
/PROC，連美國的司儀嘛會喝毋對去，在歡迎胡錦濤的場面，將PROC(中華人民共和國)喝做ROC(中華
民國)啊！
美國對台灣人的簽證嘛是改變啦！頂次的美國簽證是在1989年，就是發生”64天安門事件”迄年，是
由美國的香港領事館簽發，簽證內無國家的認定標記；即次是直接由美國在台協會(AIT) 簽發，簽證
內的國家(Nationality) 認定標記就是印：台灣(TWAN)；所以，台灣已經是予人認定獨立的國家啦
！毋通國內的人家己無認同，繼續在亂來亂去，予台灣在國際上行﹝勿會﹞出去‧
因為幾年前”911”恐怖攻擊事件，為著安全問題，所以，自後欲申請美國簽證的人攏愛兩手留手印，
嘛無人反對，每一個人攏乖乖仔照辦‧申請美國簽證的時愛留手印，欲踏入美國國土時，嘛愛復一次留
手印，比對是毋是和原本留手印的資料共款‧倒轉來看咱國內的情形，共款為著安全問題，政府欲推行
中國觀光客入境台灣時，需要留手印的政策，結果親中國的汎藍立委，大細聲反對，政府的公權力不足
，一個正確好的政策無法度推行‧台灣現此時實在民主過頭啦！自由、民主和法治，是自由多元化社會
一定愛遵守的規則，不過，在台灣只有自由、民主爾爾，法治猶未出世啦！所以，政黨輪替後的台灣，
予人感覺搁卡亂，這是全台灣人愛緊認知覺醒來改善的重點‧
以前出國遊覽攏是參加總包的團，食、蹛、交通、門票等等，領隊導遊一喝就綴著行；不過，少年人攏
時行自由行、自助遊，干哪買機票，上濟復訂旅館，其他部份攏去到位家己想辦法；阮即次是探親旅遊
的計劃，所以選半自助的行程，頭一次試看mai；就是買機票和前半的行程，有蹛、交通、部份的門票
等等，後的行程完全自由行，每工3頓隨人處理，食好食bhai看家己啦！機場報到嘛攏家己負責‧有歲
的人頭一次按呢行，嘛稍可仔dam dam，不過，嘛趣味、趣味！
孱孱將身邊的事誌交代處理，其他就將伊放落去，清心仔準備出去探親旅遊一禮拜啦！想到欲佚佗愛有
健康的身體，凡事有一好無兩好，尤其阮兩個老翁仔某同齊出國的機會嘛無濟，美國簽證真順序，半自
助的行程嘛合意，就按呢決定啦！
留言列表
