jimmycmlin的部落格

台語文~~~~~剃頭~~~~~遊子
春分秋分，日夜對分‧立夏一到，天氣就漸漸燒熱起來‧
天氣一熱，頭毛又搁長鬖鬖，蓋頭蓋面，汗流散滴，就會
互人感覺心頭真齷齪‧遮當陣，抑準會當去剃一個仔頭，
修一個仔面，洗洗吹互﹝火周﹞，歸個人就清爽起來‧這
個時陣剃頭是一種享受喔！
不過，想到細漢的時，﹝要卜﹞剃頭就真艱苦，就會頭憂
面結‧為著省錢，阮兜逐個囝仔細漢時，攏嘛是阮阿爸家
己動手‧剪刀、剃頭刀、家俬頭仔攢甲夠‧
時間若到，阮查甫囝仔攏是剃光頭‧坐佇低低的椅頭仔，
圍一條布巾仔‧歸粒頭抹一寡仔雪文波‧
看著阿爸佇邊仔磨剃頭刀，心內就俾俾顫，攃佇等‧
家俬頭仔磨好囉！阿爸用伊的倒手援我的頭，叫我﹝勿會﹞
應里亂振動，正手夯剃頭刀，一下互落去~~~‧
啊~~~~~~!
頭殼皮疼搐搐又搁﹝勿會﹞當大聲咻‧
一刀一刀續落去，心內一下一下綴佇搐‧
落一刀，搐一下，﹝辶乞﹞當時，時鐘親像無佇行，恬去啊！
一分鐘就親像歸埔久赫呢長！
“好啦！會當去洗頭阿！”阿爸喝一聲‧
這聲互我歡喜一下，好像得到赦免令，三步做兩步，改脫啦！
阿爸甲阮剃頭的情景，互阮永遠攏﹝勿會﹞當放﹝勿會﹞記‧
啊~~~!難忘的剃頭‧