jimmycmlin的部落格

台語文~~~~~願者上釣~~~~~遊子
今仔日，好天佮有閒，就上三民山頂尋老朋友開講‧
食過中晝頓，出去外頭加減行，看到幾叢仔五月雪~~~油桐花‧
一簇一簇白色的花蕊，參佇滿山的青綠色中，非常突出揚目‧
行過樹仔跤，地面鋪一層白色落落來的花瓣，親像地毯‧
看起來和雪共款，莫怪會互人稱呼叫做五月雪！
到一條細條溪仔，前幾工有落雨，溪水有卡濟，所以，猶﹝勿會﹞
到位就聽到流水聲，佇這恬靜的山內，聽著真好聽‧溪頂有一段
細條橋仔，叫做水口橋‧橋跤有水遮仔，互溪水變成一座小瀑布，
看起來搁有一點仔詩意喔！
老友提出釣竿，用飯粒仔和塗蚓仔做餌，有一爿看到魚仔﹝勿會﹞
少，魚鉤仔放落水，有看到佮感覺魚仔來啄，不過，就是不食釣，
魚群歸陣，有石斑，溪哥仔，苦柑仔---等等，看會到釣﹝勿會﹞
到！這窟釣無別窟釣，只好換來細瀑布下跤的水窟仔釣看‧
哇！食釣啊！扭起來，才像尾正指仔大，有比無卡好，緊甲囥入
桶仔底；續落去釣，坐佇石頭仔頂，聽流水聲哪開講，攏無人吵，
空氣搁好，清風微微仔吹，感覺實在有夠讚！不過，等歸埔，無半
尾魚仔來食釣‧老友講前幾工釣有十幾尾，今仔日魚仔走去覓，
抑無就不食釣，運氣無好，收收著轉去好啦！
釣魚﹝勿會﹞當急，要平心靜氣，比誰卡有耐心，擋比久，尚尾
才會贏，得到勝利‧願者去食釣才會上釣，佇社會上生活中嘛是
共款，做人做事照規矩來，不是咱應該得的，不通想貪，不去食
釣，就﹝勿會﹞出代誌，心安理得，精神爽快，生活就真好過！