jimmycmlin的部落格

新聞辭典~~~~~星光夜視鏡~~~~~遊子 2009.0416.
媒體報導：海巡人員利用先進的星光夜視鏡，佇烏暗的半暝掠到走私的歹徒‧什麼是星光夜視鏡？
星光夜視鏡過去是干哪用佇軍隊暗時相戰用的先進配備，後來擴展予執法人員使用；伊的原理是將微弱光源所反射出來真微弱的光訊號，放大做咱的目睭會當看到的畫面‧上早研究出來的星光夜視鏡，佇完全烏暗無光源的環境無法度使用，上無亦需要有淡薄仔微弱光源才會用得，所以，才號做星光夜視鏡‧毋過，後來科技進步，目前業者所講的第三代機型，已經採用紅外線補光的科技，會使佇完全烏暗無光源的環境，照常使用看著真清楚‧
佇電影”沉默的羔羊”中，女主角突然拍開電火，予戴著星光夜視鏡的兇手，即時因為光源忽然間增加真濟，伊的目睭受到強烈光源的刺激，造成短時間失明，暫時青瞑去，這是舊型星光夜視鏡的缺點啦！
現此時咱台灣執法人員所用的星光夜視鏡，已經是改良過的新型，配合著紅外線補光器，就未因為臨時拄到有手電仔、路燈等等，光度懸的光源引起燒掉；毋過，佇日時日頭赤炎炎亦是探照燈等真強的光源前使用，猶原有造成燒掉的可能喔！