台語文~~~~~大家佮新婦的問題~~~~~遊子 2009.04.15.
最近定定看到媒體報導，有出名的做戲仔，有演戲的、唱歌的等等，嫁入好額人兜，無偌久就愛離婚啦！雖然，引起的原因真濟，大家佮新婦的問題是最近上倢予人提出來討論的問題‧有1工，行過一寡仔人佇開講的邊仔，聽到[人因]講甲大細聲，笑聲嘛攏無歇，我就停著腳步斟酌聽看mai7，感覺實在真趣味亦真正有道理‧較大嚨喉空有阿塗姆仔、阿水嬸仔佮阿通師等等‧
阿塗姆仔：彼個少年翁講伊的阿母真好做伙，是1個好老母亦是1個好大家‧這種話甘會信哩？
阿水嬸仔：he是伊家自講的啦！是1個好老母可能是真的，是毋是1個好大家，並毋是伊家自講就準算啦！伊的身份無法度通感受佮發表意見‧
阿塗姆仔：就是講啊！抑是[人因]新婦講出來，亦是別人講出來，加減亦會聽哩！
阿通師：唉！新婦佮查某囝自早到今，本來就無共啦，只是面對任何事誌，mai3有無共的2種標準，愛將心比心來處理，就會當大事化小事，小事化無事，家和萬事興啦！
阿水嬸仔：是啦！查某囝是咱腹肚內出來，總是較親，無計較‧
阿通師：所以，佇序大人往生時，俗語講”查某囝斷腸肚，新婦是哭禮數”‧
阿塗姆仔：毋過，俗語嘛有講”不孝新婦三頓燒，有孝查某囝路邊搖”‧日常生活攏嘛是不孝新婦佇款待的啊！
阿水嬸仔：抑是，腹腸毋放闊，逐項事誌壓心內，親像人講”九頓米糕無上算，一頓冷糜[扌去]起來囥”‧每工心情嘛未輕鬆‧
阿通師：無毋對！老人囡仔性，稍寡仔順伊才是啦！人老機器嘛會退化，所以，有人講:”老大人嘴舌tsiann2，無糖仔亦著餅”‧
阿塗姆仔：有的大家真khiang3-腳，佇過訂新娘捧茶時就出聲，講愛一擺一杯捧出來，未使同齊捧幾偌杯‧起頭就tsam3落去，展行威，無想講是破壞氣氛‧
阿通師：啊！免hia5-pai，你會曉圍牆，我嘛會曉跳牆‧一物剋一物啦！結婚hit4一日是新娘神上大，過日就無採工‧
阿水嬸仔：這是按怎講呢？
阿通師笑笑仔講：新娘心內想大家遮厲害，我將[人因]囝壓落底就好啦！外家阿母有交待，入房了後，叫翁婿先入去洗身軀，新娘就將伊家己的衫仔褲，壓佇伊翁婿衫仔褲的頂面，又閣將新娘的鞋子壓佇伊翁婿的鞋子頂面，而且，嘴內哪唸”我衫壓你衫，以後叫你，我頭tann-tann；我鞋壓你鞋，以後叫你，你頭le5-le5”‧即招真有效喔！過去教過真濟人攏講有影真有效喔！
阿塗姆仔佮邊仔的人笑甲目屎流講：以後愛交代新郎入房了後愛鴛鴦洗啦！
阿水嬸仔：其實組1個家庭後，會和好上要緊啦！翁仔某”兩人會共心，烏土變成金”‧
阿塗姆仔：自早到今娶嫁的禮數嘛實在有夠濟，嘛發生過親項講大餅斤兩無夠，豬爿予人偷秤頭，陪對紅包的濟少等等，予新親家的某一爿感覺針無面子，感覺有夠囉嗦等等，親家才變冤家，可能連少年的婚事嘛取消拍無去‧
阿通師：是啊！雞屎落土亦有三寸煙，既然有緣做親家，實在毋通看人無；人講”新例無設舊例無滅”；省事事省，社會時代無共囉！會當改就改，會使省就省，才是綴著時代行啦！
阿水嬸仔：是啦！現此時嘛已經有人用1個大紅包總打，毋管是自頭到腳的12禮、24禮，塞桌腳等等，抑準聽到有寡仔閒人佇邊仔講閒仔話時，就應講有啦！攏嘛有tshuan5，攏嘛佇大紅包內‧
無意中聽到阿塗姆仔、阿水嬸仔佮阿通師[人因]的開講，講到大家新婦的問題，實在真正趣味閣有意思啊！
留言列表
