咱的台灣~~~~~抽豬母租~~~~~遊子 20090615
媒體報導：有3個親生兄弟，雖然，共老父共老母嘛蹛共茨內，毋過，3個親生兄弟攏無共姓，戶口名簿的排序嘛攏是長子，是按怎會按呢？這就是咱台灣自早的傳統風俗抽豬母租造成的啦！
什麼叫做抽豬母租？亦有人叫做抽豬母稅‧因為以前農業社會，家家戶戶飼豬是真普遍的生活事誌之一，飼豬的主人想欲繁殖，飼養細隻豬仔時，會揣有飼豬哥的人來幫忙，飼豬哥的人會揣這好日子，牽著豬哥去需要的飼豬家戶，路途短時攏用行的，路途較遠時嘛可能坐”籬阿甲”， 飼豬哥的人後來就直接予人叫做”牽豬哥”，後來”牽豬哥”嘛表示佇買賣時做中人，講婚姻做媒人的人，攏算是”牽豬哥”啦！
”牽豬哥” 的人，一般是佇豬哥配種後直接收錢，亦有一款無收錢，毋過，双方主人約束，豬母生豬仔囝以後，分配某一個數目的豬仔囝予”牽豬哥” 的人，這種契約行為叫做抽豬母租‧
後來，佇民間風俗中，為著傳宗接代的後嗣問題，佇無囝嗣的一爿，可能將查某囝用招的來完成婚姻大事，嘛有可能無用招的，毋過，婚姻進前先約束好勢，少年翁仔某日後生查埔囡仔時，上少有1個綴老母的姓，所以，這款約束行為嘛予人叫做抽豬母租‧才會出現共老父共老母嘛蹛共茨內，親生兄弟無共姓的情形‧
台灣俗諺講：無囝傳後代，嫁查某囝就愛抽豬母租‧毋過，時代佇進步，咱的民法亦已經修改，出世的子女無一定從老父的姓，由翁仔某佇戶口登記進前互相約束好勢就會用哩！其實後生、查某囝攏嘛共款，生落就愛飼、愛教，大漢會有孝上要緊，抑無，生較濟、姓什麼攏無效啦！
全站熱搜
留言列表
