jimmycmlin的部落格

用藥保健~~~~~豬頭皮~~~~~遊子
媒體報導：最近有3個病例有注3合1預防射，猶原出現”豬頭皮”症頭發作‧
什麼是”豬頭皮”？
咱台語講的豬頭皮，在華語叫做腮腺炎(英文是Mumps)‧伊是由病毒(Virus)
引起，在春天和寒天2季出現的病例較濟，由空氣中飄浮的喙瀾亦是直接倚到
來傳染，不過，人的一生中，毋管幾歲時予人傳染到，症頭發作過了後，以後
攏免驚復發作，和”出痲仔”(華語叫痲疹(英文是Measles)共款，會當終生
免疫啦！後來醫學科技發達，在細漢囡仔時，會使注3合1預防射來預防症頭發
作‧3合1預防射是包括：痲仔、德國痲仔(英文是German Measles)和豬頭皮
的疫苗，先注第1劑，有8成的預防效果，注第2劑了後，有達到9以上成的預防
效果‧不過，因為隨人體質關係，猶原有少數會症頭發作，但是有注過預防射
，發作時較袂赫尼阿艱苦‧
症頭發作時會出現：發燒、喙瀾腺腫疼、有時陣無注意會侵犯到中樞神經系統
來引起無菌性腦膜炎，致死率有1.4%喔！有時陣會出現併發症，有20%~30%的
查埔人可能有單爿的睪丸(lan hut 仔)炎，5%的查某人可能有卵巢炎；嘛有
人可能造成永遠的臭耳聾喔！實在要細膩啦！