台語文~~~~~世界母語日(IMLD)~~~~~遊子
今仔日是世界母語日(IMLD； International Mother Language Day)，就是每年2月21日‧
佇1996年，聯合國教科文組織佇巴塞隆納發表世界語言權宣言(Universal Declaration of
Linguistic Right)，強調任何語言攏會當準做官方語言‧1999年，搁決定由2000年起，訂
出以後逐年2月21日做世界母語日(IMLD)；認為任何語言毋哪是所有人類文化財產﹝勿會﹞當
欠缺的要素，嘛是激發創造力佮維持文明多樣性的前題，呼籲世界逐國愛認真、嚴肅來重視母
語的流失、死亡和消滅的問題，愛積極下力做母語的研究、保存和久長的繼續發展‧
佇2001年911事件發生了後，共即年的11月2日，搁佇巴黎開部長級會議，進一步確認無共文化
中間，會當互相對話是促進世界逐所在和平上好的保證，推翻掉”無共文明佮文化中間，一定會
發生衝突”的悲觀講法；認定文化多樣性是全人類共同的遺產‧文明多樣性佮自然界的生物多樣
性共款重要佮需要，是﹝勿會﹞當欠缺的‧
佇1953年，聯合國教科文組織對全世界發表一個真重要的教學原則：囝仔的母語是上有效的教學
媒介‧聯合國幾十年來真重視語言的問題，因為任何一種母語，抑是予人壓制，造成流失、死亡
和消滅，就真無機會救倒轉來，真歹完全復原‧
到今，真濟先進開發國家，攏有設立語言的保護機構，自1994年起，美國、英國、德國、加拿大
、日本等等，攏有官方亦是民間單位(親像德國的VW汽車廠)，漸漸成立語言的保護機構，嘛有提
供經費來獎勵世界逐種語言的研究、保存和發展‧所以講，注重母語已經是變成現代國家文明程
度的基本指標啦！連馬來西亞和專制獨裁的中國攏有配合世界母語日的活動，尤其中國完全是欺
騙世人的手段；顛倒佇民主、自由、文明、現代的台灣，一直猶是恬靜、恬靜，無聲無息‧
咱毋知愛搁等若久，才會當有配合世界母語日的活動？看到台灣母語日出世？
留言列表
