jimmycmlin的部落格

台語文~~~~~母語教育的沉思反省~~~~~遊子
因緣際會踏入母語教育的領域，頭尾算起來亦有5~6年啦！由志工教學開始，後來加上
正式的代課教學，雖然有淡薄仔車馬費通領，嘛是止喙焦爾爾；遮濟年一路行來，嘛歡
歡喜喜，看到將欲熄去的母語，猶有稍可仔佇吐{木燕}，心內有講袂出的爽快；不過，
今仔日的親身經驗，予我心內艱苦、感觸真濟，嘛認為推展母語教育的路途，猶是艱苦
佮遙遠‧
因為教6年級的畢業班，明仔載就是畢業典禮啦！早起無上任何課，改做畢業典禮預演，
想來嘛真久無參加學生囡仔的畢業典禮囉！順這個機會復來感受著畢業氣氛；雖然講是
預演，不過，所有的程序攏要照步來進行，只是預演時做著無法，就要求NG重來一擺，
凡事攏嘛是”一擺生疏，兩擺就熟”‧親像俗語所講：倢講喙會順，倢做手袂鈍‧頭仔
尾的現場是予人會感動佮感受到欲離別的氣氛‧到底是什麼代誌予我感覺推展母語教育
的路途，猶是艱苦佮遙遠？就是全場頭仔尾無聽到一句母語！
畢業典禮自起頭司儀報幕開始：唱國歌、貴賓致詞、校長致詞、頒獎、在學生的代表祝
賀詞、畢業生代表致答詞、會後活動等等‧自頭到尾攏是以所謂的國語(華語)進行，五
年級代表在學生的祝賀詞唸到上尾時，唸出”做一個中華好兒女”，即陣，台灣頭到台
灣尾，逐家攏佇認同台灣愛台灣，是毋是將彼句改變做”做一個台灣好兒女”，予全場
的大人囡仔聽到到是若仔好啊！佇畢業致答詞的上尾仔嘛唸出：”親愛的老師再見！親
愛的同學再見！”佮英語的”good bye , Teacher ! good bye , My friends!”
是按怎無法度加一句台語的” 親愛的先生再會啦！親愛的同窗再會啦！”會使出現英語
，袂使出現台語？佇唱國歌時，邊仔的配樂突然間恬去無聲，校長的音樂底柢真好，隨
比手勢來指揮，予全場的人繼續順序唱落去‧
由這點會使看出主事頭人對音樂方面的看重！嘛會當瞭解畢業典禮全場用所謂的國語(華
語)進行的用意，亦有佇上尾仔唸出英語的用意；用按呢來對照比較，嘛瞭解到主事頭人
對母語教育看重的程度‧予我感覺投入母語教育的跤手強欲軟落去‧其實，自2000年政
府開始認真推展母語教育政策，即種現象一直普遍存在，佇每一間學校推展母語教育是
毋是有落實？完全看這間學校主事頭人的想法，當然佇全校老師佮學生囡仔表現出來的
學習態度佮學習成果自然是完全無共的啦！
唉~~!欲順序推展母語教育的路途，猶是艱苦佮遙遠啦！