台語文~~~~~咱退休後欲煩惱的代誌~~~~~遊子
咱一生勞碌拍拼，總有1工要由工作的所在退休，雖然退休的歲數時陣隨人無共，
退休後欲煩惱的代誌亦有淡薄仔精差，不過，由英國保誠人壽公司委託尼爾申(AC
Nielsen)市場調查公司所做的調查結果，大體講起來有下仔幾種：
(1).煩惱身體健康無好：88%.
(2).煩惱退休金無夠用可能要復出去工作：42%.
(3).煩惱日常生活無人通做伴：38%.
(4).煩惱退休無夠用要儉腸捏肚過日子：37%.
(5).煩惱無法度負擔長期醫療費用：24%.
(6).煩惱日常生活無目標失去生活重心：21%
(7).毋知欲按怎樣安排日常時間生活無趣味：15%
(8).煩惱退休金予序細仔提去開掉：7%.
依據統計：教育程度愈懸的人，愈煩惱退休後身體健康無好的問題；教育程度較低
的人，上煩惱退休金無夠用可能要復出去工作的問題，但是，感覺技術、跤手體力
等攏綴袂到啦！
為著欲有快活的退休生活通過，退休進前的規劃是真正要緊，除了做好理財分配規
劃以外，平常時就要養成運動保健的好習慣，養成健康的飲食方式，培養正當的生
活趣味，交陪講有話的朋友‧退休後，心境放予開，囝孫自有囝孫福，所以，序細
仔的任何代誌，會使mai參就mai參；自我時間增加，會使投入志工的代誌，將時間
佮智力奉獻予社會需要的人群團體，咱的日常生活就袂無目標，亦袂失去生活無重
心的煩惱啦！嘛會使行東往西，看山看水看風景，國內國外行行遊覽看看比較；嘛
會使學東學西，只要咱袂曉的任何代誌，攏會使去學，俗語講：食到老學到老‧學
了會感覺真趣味，時間無夠用，日子真好過喔！少年時勞碌拍拼過頭，食老嘛無需
要虐待家自，毋通傷過儉腸捏肚來過日子，予咱家自心內歡喜較要緊啦！
全站熱搜
留言列表
