jimmycmlin的部落格

台語文~~~~~讓位~~~~~遊子 2010.03.29.
前幾工欲去台北[口林]喜酒，因為年歲關係，暗時較無愛駛車，尤其這陣坐火車佮公會亦是捷運，悠遊卡會使1卡通用，感覺真正方便‧
只是無想到講：佇真kheh的火車亦是捷運的車內，竟然有少年人起身欲讓位予我坐！向[人因]說多謝坐了後，心內非常感慨，雖然，家己一直無認老，毋過，可能白蒼蒼的頭鬃、行路的表現，予邊仔人看出合著予[人因] 讓位的資格啦！
想著過去讓位是我欲讓位予別人才對啊！自讀高中坐火車通勤開始，一直到這陣為止，只要坐無對號的大眾公共交通工具，有機會、有適當的對象，我攏一定會讓位啦！無論我偌悿，這嘛是已經變成慣勢啦！
古早的座位攏共款，後來才設博愛座，提醒一般人，上車後毋通秤採坐，應該保留博愛座予需要的人，除了老大人以外，親像：行動不便的人、有身的查某人、tshua7細漢嬰仔的人等等，這亦是倫理道德的好表現‧
雖然予人讓位，當然先對[人因]感謝，毋過，我會看情形才來坐，抑準，邊仔有人閣較需要，就轉讓予伊，雖然是借花獻佛，心內嘛是真歡喜‧
讓位其實毋是干哪出現佇坐車的時，佇咱生活中嘛隨時、滿所在看會到，上班做穡時、分配工課時、分財產時、有機會升官、升級時、逐種比賽時等等，由相爭佮相讓，會當感受到佮看清楚人性本來的底諦，有量有福氣，互相間應該像俗語所講：相讓食有賰，相爭分無份啦！