jimmycmlin的部落格

(頂仔是大叢青仔)
轉貼台語演講稿~~~~~我若是一叢樹仔~~~~~楊丹宏(遊子整理)2008.11.25.
各位評審、各位來賓：逐家好！
我是第7號，今仔日我所欲演講的題目是：我若是一叢樹仔！我若是一叢樹仔！
我若是一叢樹仔，我想欲做一叢樟仔樹‧我蹛佇花蓮，台9丙線往鯉魚潭彼chua7公路的路邊，恁若駛車欲來鯉魚潭佚佗，著會看到我，恁經過一段青色磅空的時，我佮兄弟姊妹著排佇hia，親像五星級大飯店門口的服務生共款，si-si-sut-sut、sinn-sinn-soainn7-soainn7，唱歌甲逐家相借問。
自細漢，我佮我的兄弟姊妹，予修路的工人種佇遮，細漢的時陣，逐年的熱天時，我攏真驚惶，驚雄雄來的大颱風，會甲我at斷，甚至甲我規叢挽- -起-來‧阮逐家手牽手、心連心，度過一擺閣一擺的難關；一支草，一點露，逐工吸收日頭佮土地予阮的營養分，1工1工un5-un5-仔大漢，心內的孤單佮驚惶，才漸漸仔無 -去。
我大漢了後，生做真[身長]，枝葉嘛真am7，有較大片的樹蔭，所以，阮連做伙，成做一段青色的磅空，予過路的人心涼脾肚開，心情輕鬆無底比‧生了[身長]，閣予我眼界變闊，夯頭一下看，花蓮大山大海的好景緻，我逐工攏看甲正爽快。
我有真濟好朋友，青苔仔、烏頭khok仔種種的鳥仔，愛食我的漿果，嘛有一寡尾iah8仔會佇我遮生卵，用我的葉子tshiann養in的下一代，有時仔膨鼠嘛會跳起來我的身驅頂佚佗。
若是樹仔有選美比賽，我想阮樟仔樹有信心到冠軍‧阮的樹頭在，企挺挺，身體勇壯，枝葉am7，樹型嫷，葉子青翠，規身驅攏有芳氣，親像抹一層天然的芳水。
若是講著對台灣的貢獻，阮閣愈會通hiau-pai，毋管是山頂、公園內亦是車路邊，台灣一四界攏有我的同伴的形影，我會放出芬多精，予自然充滿清幽的氣味‧我的身驅會使做椅子、桌子、冊櫥種種的家具，閣會使提煉樟腦，樟腦油噴佇衫仔頂懸，會當甲[虫蒙]仔趕走，樟腦丸he7佇thang3-suh 內底，較袂覓蟲子‧百外冬前，阮嘛替台灣佇國際上拍響知名度，因為彼當陣的樟腦產量，台灣是世界第一！
我的樹仔朋友，大部分攏會當保持水土，製造清新的空氣，閣會當提供鳥仔、蟲子生存的空間‧真可惜- -的是，人類為著開墾亦是其他的經濟利益，續甲我真濟的樹仔朋友，攏[坐刂]了了，造成一寡物種消失，結果引起走山、土tshuah流，全球暖化的情形愈來愈傷重‧咱攏是地球的一份子，實在應該愛好好仔珍惜咱企起的所在才對，你講有影- -無？
我的演講到遮結束，感謝逐家。
補註：這篇是楊丹宏參加台語演講比賽的演講稿‧楊丹宏國校5年，這擺參加花蓮市台語演講比賽，國校學生組到第1名，花蓮縣比賽到第2名‧文稿以漢羅併用文體，用台羅拼音系統。後來發表佇台文通訊第172期第15頁。