jimmycmlin的部落格

用藥保健~~~~~會當避孕毋通棄養~~~~~遊子
1個新生命是在充滿著期待和祝福中來到即個世界，有身孕的母親是充滿著驕傲和滿腹的歡喜，全家族的人
攏充滿著喜樂來迎接新成員，咱台語有講：加人加福氣！尤其在近來台灣綴著世界的跤步，進入老年化的
社會和少子化的現象，家庭內有新生命來報到加入，實非常予人歡喜的事誌啊！
不過，有時陣嘛在媒體報導中看到予狠心父母放sat的新生兒、拄出世的嬰仔，實在真苦憐、真毋甘；in是
意外來到這個世間，因為in的父母無拍算，予in變成無受到歡迎的新生命，遮完全是in父母的毋對、無責
任又殘忍自私，造成的結果‧
所以，衛生主管單位自早推行的家庭計畫，是包括優先學、予欲生的人知影按怎樣來生出正常健康的嬰仔，
嘛予猶未欲做父母的人，知影按怎樣來避孕，來避免無受到歡迎的新生命來到即個世界，減少人倫的不幸和
家庭、社會的負責‧
所以，猶未欲做父母的人，尤其是少年人亦是經濟基礎無好的人，真需要認識瞭解正確的避孕方式‧查埔的
用保險套，查某的用體內避孕器亦是食避孕藥‧如果攏無做好事前的準備，上無嘛要知影按怎樣在事後緊來
補救的方法‧
口服避孕藥在第二次世界大戰後發明出來，予世間人叫做20世紀上偉大的發明之一！和電火球仔、抗生素、
疫苗、塑膠等等的發明，共款對全世界的人有真大的貢獻，歷史學家公認，口服避孕藥是避免全世界的人口
爆炸，伊的影響力比愛因斯坦的相對論和原子彈復卡大喔！
緊急口服避孕藥就是一般所講的事後丸(After pills)；是予攏無做好事前的準備的人，在辦事後的緊急
補救方法‧一般需要事後的72點鐘內先食第1粒，隔12點鐘繼續食1粒，按呢就會當達到避孕的效果‧不過，
事後丸毋通用做正常的避孕方式，因為定定食事後丸來避孕，到尾仔副作用嘛真無好，親像：月經量傷濟、
月經無正常、有時會出現一點一點的出血情況等等‧
另外，口服的漏胎藥RU486(Mifepristone，美服培酮)是屬於第四級管制藥，適用在有身孕7禮拜以內才會
當用，患者要在醫師面頭前食藥仔，續落在病院內歇睏一段時間才會當離開，36~48點鐘後，需要倒返去病
院，復食misoprostol，按呢才是一個完整的療程‧患者千萬毋通在外面偷偷仔買來食，是真危險的事誌啊
！
最近上新的報告，美國wyeth惠氏藥廠已經發明出3個月食1次就好的口服避孕藥~~Anya(安雅)，毋免逐工來
食避孕藥，有夠方便啦！不過，所有的口服避孕藥，攏會引起血栓、奶癌的可能，(勿會)當放(勿會)記得喔！