jimmycmlin的部落格

台語文用藥保健~~~~~大箍呆~~~~~遊子
台灣囡仔歌謠有唱著：大箍呆炒韭菜，火歕化偷拈菜~~~‧甘有影大箍人一定攏卡呆？大箍人是卡好笑神、
卡有肚量，卡屬甘草型的人，是毋是卡孝呆？這是無一定啦！不過，上新的媒體報導：脂肪濟的人，智力
會卡低；就是講咱人愈大箍會愈孝呆喔！


這是在法國一項上新的研究報告講著：咱人愈大箍毋哪引起血壓升懸，心臟的負擔增加，生命會縮短，
嘛會損害到智力；體內脂肪愈濟的人，對事誌認知的能力愈差；認知的能力嘛卡緊退化‧
研究實驗中選出2群無共身體質量指數(BMI)的人，分別是BMI在20以下和BMI在30以上；年歲是32~62
的查埔查某，為期5年，先進行4項心智能力測驗，5年後復共款做1次心智能力測驗，互相比較對照‧結
果證明，確實是卡大箍的人認知的退化率卡懸‧


研究實驗的專家認為：人體脂肪分泌的賀爾蒙可能會損害到頭殼內的智力細胞，造成腦筋功能的退化；
嘛有可能是體脂肪懸會造成血筋壁變厚和硬化，是心血管的危險因子，準做血筋壁變厚和硬化出現在
頭殼內，影響到腦筋血流，嚴重時就是腦中風啦！平常時無法度發現，就是慢慢仔影響腦筋功能，會
漸漸來退化‧
所以講：大箍呆毋是講笑爾爾，大箍實在會影響到咱身體逐所在的器官喔！亦是要維持3低飲食，低
糖、低鹽、低油，保持運動33制，予咱的身體質量指數(BMI)維持在上適當的範圍，BMI=18.5~24
中間， 表示上標準啦！