jimmycmlin的部落格

新聞辭典~~~~~閏月~~~~~遊子 2009.06.29.
媒體報導：今年閏5月，食豬腳補運‧俗語亦有講：3年1閏，好歹照輪‧閏月又是按怎算？按怎來的？
因為舊曆(陰曆)的計算佮月娘的運行、海潮的變化有關係，才會算出大月30工，小月29工，規年落來，佮以日頭運行的陽曆(新曆)1年拄仔好差11工，所以，算起來差不多2~3年會精差1個月，陰曆的閏月就是按呢來的‧
毋過，閏月到底會排佇叨一月份是無得確，因為這佮節氣有牽連，一般閏月彼(hit)個月攏出現佇干哪1個節氣的月份；親像今年閏5月，就干哪出現小暑(新曆7月7日舊曆閏5月15日)1個節氣爾爾，以後會閣出現閏5月的年度亦已經算出來囉！會出現佇2028年、2039年、2047年等等‧
依照現主時陰曆計算閏月的方法，大約每19年會出現19個閏月，所以，21世紀總共會出現37個閏月耶！咱每人的生日嘛每19年會出現1擺新曆佮陰曆共1工的情形喔！抑是毋相信，滿19歲以上的朋友會當隨人算看mai7‧
民間習俗，舊曆5月是熱天時，較會發病、身體無順序，予人看做毒月，所以，佇閏5月的這個月內，以豬腳麵線來補運，素齋的人以麻油麵線來補運，另外加壽桃嘛會用哩！嫁出去的查某囝買豬腳麵線返外家茨，是予父母添歲壽，主要是做人囝兒孝敬父母的心意啦！時代佇改變，改用紅包代替嘛可以‧