jimmycmlin的部落格

新聞辭典~~~~~”@”符號應該按怎講~~~~~遊子 2009.06.29.
佇網路科技發達的時代，全世界愈來愈濟人時行以電子批來代替傳統的寫批方式，因為好處真濟：省錢免貼郵票，閣緊、比限時批亦是電報閣較緊，方便佇任何所在攏會使寄出，內容無限，文章、相片、影片等等攏會當寄出；莫怪老老幼幼攏愛用‧
欲用電子郵件，起頭一定愛設定電子批址，向大型入口網站申請電子批箱，公私機關行號，只要有家自的網站，家己的員工隨人就有電子批箱；全世界統一規定電子批址的方式是：abcd101@XXXX.com
其中”@”是無變，頭前是代表個人的符號，後壁是設立電子批箱的入口網站‧佇咱台語慣勢將”@”叫做細隻貓鼠，華語叫做小老鼠‧親像頂仔舉的例就講：abcd101細隻貓鼠xxxx.com；華語講：abcd101小老鼠xxxx.com‧
毋過，佇世界其他國家對”@”符號毋知按怎講？
有影耶！有寡仔國家亦會將”@”符號叫做小動物，親像：瑞士、義大利、白俄羅斯等國家，會將伊叫做做螺仔，亞美尼亞將伊叫做狗仔，克羅埃西亞、斯洛維尼亞將伊叫做猴子，德國將伊叫做蜘蛛猴，荷蘭佮羅馬尼亞將伊叫做猴子尾溜，斯洛伐克佮捷克將伊叫做醃的魚仔捲，佇中國將伊叫做圈仔a亦是花a‧
毋過，現此時英語猶原是全世界上強勢、上通用的語言，佇講英語的世界將伊叫做什麼？英語將伊叫”at”，就是佇什麼所在的意思‧親像頂仔舉的例就講：abcd101 at xxxx.com‧
所以，佇台灣對外國的客戶、朋友用英語講你的電子批址時，你講細隻貓鼠，外國的客戶、朋友保證聽無你佇講什麼，緊講”at”就無問題啦！