jimmycmlin的部落格

[這幅是18世紀由"凡‧布拉姆"所畫的台灣地圖並毋是康熙台灣輿圖]
新聞辭典~~~康熙台灣輿圖~~~遊子 2012.05.19.
佇今年第13任咱台灣的民選總統就任時，行政院合併原本的新聞局、文建會等，新成立文化部，由原文建會主委龍應台擔任頭1任的部長，伊佇辦公室入門的壁頂掛著大幅的”康熙台灣輿圖”，又將文化部頭銜後面的中華民國提掉，大家攏佇臆看到底是代表什麼意義啊？
根據點藏”康熙台灣輿圖”的國立台灣博物館所記載：”康熙台灣輿圖”是目前所知影現存上早的單幅彩繪台灣全圖‧依據最近幾年來各界專家考證的結果，攏認同”康熙台灣輿圖”所繪製的年代，大約是佇清朝康熙38年至43年間[西元1699~1704年間]；聽講上早這幅圖囥佇清朝宮廷內，後來因為義和團之亂[西元1900年]才自宮廷內流出，閣後來由日本統治台灣的總督府佇明治35年[西元1902年]開錢買入，才變為台灣博物館的鎮館之寶‧
”康熙台灣輿圖”橫長是536公分，企懸是66公分‧這種正爿倒爿橫長型的觀看方式，其實佮當時繪圖者由清朝帝國的心態角度來看台灣是有關係的啦！
西元1683年康熙派明末叛將施瑯來攻克台灣後，才將台灣劃入清朝的統治內，這幅地圖自此將台灣列入中國的版圖；地圖內容所表示的是17世紀尾仔至18世紀頭仔，清朝康熙皇帝佔領台灣初期的情形，以寫實的手法畫出台灣西部由北到南的山川地形，兵力分佈的所在佮大小城堡田庄等等的生活景緻等等。
所以，莫怪大家攏佇臆看文化部現此時掛上這幅地圖，又將文化部頭銜後面的中華民國提掉，到底是代表什麼意思啊？其實政治意涵免講自明，想欲蓋顛倒愈清楚啊！