jimmycmlin的部落格

新聞辭典~~淡定~~遊子 2012.05.16.
最近佇媒體的報導中時常看到”淡定”的詞句，到底”淡定”是什麼意思？
”淡定”是指1個人拄到代誌時，心理佮外表攏表現出真正冷靜、鎮定‧若是以古語來講，親像”黃帝內經”所講的”恬淡虛無”‧所以講這個詞句並毋是新發明的，毋過，為怎樣最近又閣時行？紅甲透規台灣？
起因是：佇網路上出現1篇文章”分手擂台的淡定哥紅茶”，予網友掠來掠去轉貼分享，反應愈來愈熱‧文章內容是講：1對查埔查某的愛人仔，因為查某的稍可仔有變心的款，想欲雙跤踏雙船，後來，予原本的查埔愛人仔約出來談判分手的代誌，無想著這個查某囡仔，竟然佇學校的餐廳演出”一吼、二鬧、三上吊”的戲劇出來，原本的查埔囡仔顛倒真正冷靜，恬恬仔[口林]著紅茶，毋偌恬恬仔承受著對方大聲的吼喝，又閣提出面紙予查某囡仔拭，希望兩人會當好來好煞，互相冷靜來分手。所以，這個查埔囡仔予網友號做”淡定哥仔”，伊[口林]的紅茶亦叫做著”淡定紅茶”！
親像立法委員建議財政部劉部長應該”淡定”，意思是講愛伊面對證所稅的爭議，毋通走閃神隱，應該保持冷靜佮鎮定啦！