台語文咱的台灣~~七股潟湖－jimmycmlin的部落格

台語文咱的台灣~~~~~七股潟湖~~~~~遊子
七股潟湖的面積達到幾仔千公頃，屬於古早台江內海的遺跡，因為內海是風平
浪靜，外圍有頂頭額汕和網仔寮汕沙洲來阻擋風湧，予內海地區孕育出非常濟
種類的內海溼地生態資源；幾百年來，是住民飼養蚵仔和逐種貝類、螺仔類上
好的所在，亦是養殖魚塭仔真好的所在，逐種螃蟹嘛真正濟：角眼沙蟹、和尚
蟹、招潮蟹、元軸蟹等等，幾仔萬隻在濕沙仔地爬來爬去‧因為社會環境的變
遷，一寡仔原本依附漁村的相關行業，漸漸消失去，不過，飼養蚵仔和逐種貝
類、螺仔類、養殖魚塭等等，猶原繼續存在，配合現代人的休閒活動，推出坐
竹排仔亦是遊艇做內海溼地生態旅遊，嘛非常受到歡迎喔！

難得的好天氣，季節欲入到補冬囉，日時猶原超過30度，咱逐家就坐佇遊艇頂
，聽著解說員漸漸講著台南七股潟湖的景觀生態佮歷史，微微仔的風，一陣一
陣由台灣烏水溝~~台灣海峽迄爿吹過來，互船頂的人﹝勿會﹞感覺潝熱，水面
一波一波的白湧，無講真大，看來是坐船遊覽的好時陣‧
沿路的水邊，真旺的水筆仔、海茄苳、五梨跤、欖李等等，這四種攏叫做紅樹
林，沿路做成一條綠色的水道，樹仔跤的濕地，不時會當看到招潮蟹、夜目大
眼蟹、和尚蟹、真歹的元軸蟹、彈塗魚等等；樹仔頂企著真濟大白鷺、細白鷺
和叫﹝勿會﹞出名的渡鳥，水面沙洲嘛激歸陣的渡鳥，尖尖的喙管，潛入水底
佇討食，頭殼頂嘛不時有大細隻的渡鳥，飛過來飛過去，予平靜的水域，變成
真鬧熱，逐家一面聽，一面看，攏感覺非常趣味，真稀罕啊！可惜無看到烏面
琵鷺，因為in攏佇欲暗時，才歇佇近海的沙洲頂，愛去海邊仔才看會到‧

遊艇慢慢仔徙過水上森林，看到水面上插真濟長長的竹篙仔，解說員講he是囥
定置網用的，魚網仔固定佇水底，定期過去巡，順續將走入去魚網仔內的魚蟹
掠出來；繼續向前行，看到一區一區的蚵仔棚，解說員講飼佇潟湖的蚵仔，愛
10-12個月才會當收成，抑是飼佇外頭近海的蚵仔，6個月就肥擱大好收成，不
過，熱天時有風颱期，無法度飼養，一般愛白露過才開始飼養，一直到過轉年
的熱天期‧看到蚵仔棚，就想到舊年熱天去澎湖tit to時，現烘的鮮蚵仔，
10的人1爐，由在你食到飽，撥開蚵仔殼，大粒鮮蚵有夠讚啦！即馬想著，喙
瀾水就強欲流出來，有影每人攏食甲喝毋敢啦！後來去東港的大鵬灣，平平是
現烘鮮蚵仔，品質和氣氛攏對﹝勿會﹞到，差有夠濟，所以，推廣觀光遊覽活
動，真正需要用心設計和規劃，才會予人o lo和懷念、推薦啊！
遊艇愈來愈倚四草跨海大橋，解說員講一般無申請許可證的任何船隻，攏﹝勿會﹞
當駛過橋，抑無就變成偷渡客啦！四草跨海大橋的迄爿，就是古早人講的台灣
烏水溝啦！海湧大復猛，唐山公毋驚死，渡過台灣烏水溝，來台灣賺食‧in嘛攏
有可能是咱的祖先喔！另外，佇倚大橋的海域，嘛看到幾仔排的竹篙仔，解說員
講he是準備卡過欲予鰻仔栽用的‧