jimmycmlin的部落格

莊子講(20)~~~~~草猴的手來擋車~~~~~遊子
顏闔問蘧伯玉講：有1個人，伊的天性真愛﹝台刂﹞人，抑是寵幸伊，就會危害著
國家，毋過，抑是去苦勸伊，就會先危害著家己啊！即個人攏干哪看到別人的過失
，攏看﹝勿會﹞到伊家己毋對的所在‧拄著即款情形，愛按怎樣卡好？
蘧伯玉應講：對付即種人愛用善巧合順，千萬就mai去激怒伊‧抑準，伊像嬰仔共
款，你嘛愛裝做和嬰仔共樣；抑是，伊講話做事誌是顛三倒四，你嘛愛裝做是顛三
倒四、悾悾戇戇共款；先予伊感覺你和伊是共一款的人，講話卡會投機，漸漸你才
有法度將伊引領過來‧
顏闔又問講：是按怎愛先對伊扶扶搭搭，赫尼阿順伊？
蘧伯玉又應講：你甘無看過草猴？你先刺激伊，予伊生氣，續落來，伊就舉手來擋
車輪仔，想講伊的力真大‧抑是你先歕雞規，講大聲話，講你有才調去應付伊，按
呢先刺激到伊，你就親像草猴用手來擋車，共款是真危險啊！
所以講：咱想欲勸人為善，愛看時機、看所在、看氣氛，抑是所用的方式無正確，
定定是顛倒會惹來危機喔！干哪想欲用家己的特別步數去壓倒別人，是非常危險的
事誌啊！
註："草猴"就是華語講的"螳螂"‧所以華語的題目叫做"螳臂擋車"‧