jimmycmlin的部落格

莊子講(61)~~~石匠和郢人~~~遊子
惠子過身了後，莊子真思念伊，送葬去到墓仔埔邊‧
莊子對綴在邊仔的徒弟仔講：有1個郢人土水師父，佇抹白灰壁時無張持，有1滴白灰膏落在
伊的鼻頭上，伊就請同齊佇共所在做事的雕石師，將伊鼻頭上的白灰膏處理清氣‧
雕石師手舉斧頭，喙喝講：來！欲刜落去喔！
土水師恬恬仔企直直講：放心仔來啦！
一下仔工，鼻頭上的白灰膏就無了了‧因為土水師企直直攏無振動，所以，一屑仔皮傷嘛無‧
宋元君知影即項事誌感覺真好奇，就吩咐下手人講：去將迄位雕石師cue來‧
宋元君對即個雕石師講：我嘛共款將白灰膏滴在我的鼻頭上，予你來刜落去處理，好毋好？
雕石師聽到就應講：我以前是有按呢刜落去處理過，不過，我的對手已經死啦！真失禮！我
欲走囉！
莊子繼續講：親像雕石師共款，自惠子過身了後，我的對手嘛已經死啦！我就無會當好好仔
講話的對象啦！
所以講：對手的存在是相對的，有相爭、敵對、嘛是加強進步的因素喔！有人遇強則強，遇
弱則弱；無適當的對手通競爭時，實在嘛予人感覺真寂寞、悲哀，無趣味啦！