jimmycmlin的部落格

莊子講(62)~~~露螺角上的兩國~~~遊子
魏惠王和齊威王互相結盟；過無若久，齊王先背信無守盟約，魏王知影了後非常生氣，
就欲發號施令講：隨發兵去攻打齊國！
有1個下跤手就對魏王講：大王，大王‧你會當先聽在下講1個小故事予大王參考喔？
魏王講：好啊！講來聽看mai‧
下跤手續落去講：大王知影有1種細隻動物叫做露螺？
魏王講：是啊！知啊！
下跤手講：露螺的頭殼頂有2支角，有人踮露螺角上建立國家，倒爿的角上叫做觸氏，
正爿的角上叫做蠻氏，這2國嘛定定為著爭土地，互相出兵相戰，定定嘛拍到半相死‧
魏王大聲喝講：胡亂講，那有可能有即種事誌！
下跤手慢慢仔講：大王‧天地四方甘有窮盡？
魏王講：當然是無窮盡啊！
下跤手講：在天地之中有1個魏國，魏國的京城在大梁城；大梁城內有1座大宮殿，在
宮殿內有1位大王‧照按呢看，大王和露螺角上的觸氏、蠻氏，有什麼差別、無共款？
魏王聽完才無話通應‧
所以講：世人爭地、爭財、爭名，在有道的人來看，嘛是完全親像露螺角上的觸氏、
蠻氏，互相爭鬥共款啦！甘毋是？