台語文~~~~~牽罟~~~~~遊子 2009.04.22
最近佇志工台語教學中，看到謔畜仔話”火燒罟寮”~無網啦！無望啦！對全班的學生囡仔簡單解說後，40年前佇高雄讀冊時，去旗後(現此時叫做旗津)佮人鬥鬧熱，湊1腳落去牽罟的情境，一直出現佇我的頭殼底佮眼前，予我佇閒的時慢慢仔來懷念著真趣味的牽罟‧
牽罟是咱台灣古早掠魚方式的一種，大概佇1970年前真正時行，後來魚船機器化，掠魚仔愈方便，掠魚仔量嘛愈濟，才漸漸退時行，毋過，最近幾年來，因為休閒產業的出頭，亦是欲予即馬的少年人、細漢囡仔會當瞭解咱前人古早掠魚的方法，佇海岸又閣時行牽罟的活動‧
牽罟是佇海[土乾]揣1個固定的點，由幾個人駛竹排仔亦是舢舨，載罟網去到外海適當的所在，將罟網順序放落海中，續落將竹排仔亦是舢舨駛倒返來海岸，由1個人落海去牽罟網的另外一頭索仔頭，扭著索仔頭行上海邊的定點，集合佇海邊的眾人開始分做2排，分別做陣同齊大力扭双爿的罟仔索，人數由幾十人到百外人無一定，逐家親像佇扭大索比賽，大大小小攏真拼命‧因為俗語講：牽罟倚索就分錢，牽罟有人就有份，大腹肚的分双份‧想到等一下有通分，當然是真拼命扭啦！真正是有網(望)上嫷，希望相隨啊！
古早技術猶未進步，平常時掠魚仔量嘛無濟，所以，只要倚海的所在，牽罟是海口人真重要的在地漁業；牽罟的漁期是規年透天攏會使，1組罟仔槽大約由14個人合股做頭家組起來，同齊出錢做股本，準備買1領大罟網、1台柴做的罟仔船等等，做頭家的才依照所份的股份濟少，隨人去招罟仔腳‧有的莊頭人較濟，牽罟的組仔數嘛較濟組，可能會將海[土乾]分區，才閣用抽籤的方式，公平輪流使用漁場，逐家講通和，mai相爭相搶，逐家攏有魚通掠，去賣錢貼茨內用，亦是有魚通食來配菜鹹‧
每工逐組罟仔槽的負責人攏會輪流派人去海面漁場巡視，看到大陣魚陣浮現時，隨大力pun5罟螺，大聲通知海[土乾]的罟仔腳緊倚來牽罟掠魚‧一般牽罟所掠的魚仔類以苦蚵仔、鰩仔、鰹仔魚等等較濟，有時參有目賊仔、蟳仔、花枝等等，食未完的就曝做魚仔乾，sinn7做鹹魚仔等等保存起來‧所以，佇古早物資無濟，日子較歹過的時，牽罟對蹛佇海口莊頭的人來講，是漁民生活的展現，亦是莊頭內人佮人做伙交陪關係的表現‧
牽罟是古早留落來的歷史腳跡，是逐家鬥相共佇勞苦中充滿著希望的活動，現此時來恢復推展，會使予咱大大小小來體會到前人佮大海拼命討食的精神佮艱苦的情境，實在是真正有意義的啦！毋捌牽罟過的朋友，應該揣機會去試看mai喔！
留言列表
