臺語文：洗薁蕘（o3-gio5)
薁蕘是華語所講的「愛玉」，其實伊的稱呼亦有十外種，只是臺語薁蕘佮華語「愛玉」上通俗普遍；佇熱天時逐家攏真愛食的清涼退火物.咱去1000公尺以上的高山野外行行看看時，有機會看著木本樹仔親像菁仔欉用氣根來牽藤，趴佇邊仔懸懸大樹仔欉 上，亦有趴掛佇岩壁縫頂，會當牽甲幾仔丈長喔！在欉的果子是圓形、卵形、紡錘形，外皮青綠色，看起來親像時計果（華語講的百香果），咱是挽伊熟的果子，切開曝乾，取伊內底的種籽來使用。
有幾仔擺出遊的時陣，行程內安排有家己動手洗薁蕘的機會，亦攏有做成功，逐個組員攏真歡喜，隨人做家己食，感覺佮用買便的是完全無共款。
一般是3～5人編一組，分配著：一個清氣的盆仔、處理好的薁蕘籽、細目紗布巾袋仔、清氣的樹奶手套、冷滾水⋯等等.組員隨人分配工課後，就會當開始動手囉！
毋過，有幾個仔鋩角一定愛注意、抑無，是洗袂出好食的薁蕘喔！
1: 愛用水道水先燃滾過的冷滾水，才有礦物質尤其是鈣質佇水內，才會當佮薁蕘種籽內的膠質、酵素結合凝結做伙；有人想講用過濾水、市面的飲用水等較衛生、較安心，其實水內傷清氣，欠缺礦物質顛倒袂成功.
2: 水佮薁蕘籽的比例是50:1上好，有時會當增加到75:1，遮是盡磅囉！閣增加水會改變彈Q度佮入喙的口感.
3:洗的時間拄好著好，並毋是愈久愈好，咱是欲洗出薁蕘種籽內的果膠佮果膠酵素，洗傷久時，連纖維亦洗出來，就影響著酵素凝結的效果.
逐家動手前斟酌聽清楚，續落來雙手無閒，一下一下認真洗、揉、搦、搓、捏，看著盆仔內的冷滾水，沓沓仔有物件由紗布袋仔透出來，掺溶入冷滾水內，愈來愈濟囉！手無力時才換人來洗，一般愛洗5～10分鐘左右，哇！哇！哇！無共組的人，輪流大聲喝出歡喜的聲音，逐家攏真趣味佮歡樂，只驚袂成功爾爾.閣過一下仔久，老師行到每組的邊仔看mai3，無做好的所在，隨指導調整，期待逐組攏會當有成功的作品～好食的薁蕘.
拄仔做好時，猶水水的樣猶袂凝結甲真完全，一般愛恬恬囥佇桌頂30分鐘至2點鐘，才是真正好食的薁蕘，愈享用時才閣淋著糖水、蜂蜜水、檸檬汁⋯，閣增加冰角，佇熱天時就是真讚的清涼物啦！
留言列表
