臺語文：讀完「説不完的故事2」的感想
佇公會的資深會員群組內，熟似臺大校友的前輩王在斌學長，伊現任臺大藥學校友景福基金會董事長，今年重陽節前有緣予伊寄贈「説不完的故事2」，內容是編輯者走揣訪問13位臺大藥學人，有教授、前輩、後進的無共領域做穡，人生過程沓沓滴滴真心的破腹分享.自網路發達，3C用品普遍後，著真久無閣認真看紙本冊囉！這次因為亦是藥學人的因緣，冊內的作者真濟位亦攏佇我個人的人生過程中有接觸過、有受關懷過，所以，有親切感、亦真認真佇2工內斟酌看完，心內的感受是真深，心緒綴著文章的講説進行，一幕一幕的過往畫面亦顯示在我的頭殼內⋯。
本冊是由陳媽媽的貢獻做起頭，陳媽媽是台大藥學人對陳瓊雪教授（第一屆校友）的尊敬暱稱.伊以藥學系為家，予我想著阮系盧盛德生藥教授亦是每工紥兩個飯包，透早透暗攏留在研究室的過往事；陳媽媽推動真濟項有眼光的遠程目標，亦一直影響到現此時藥師晚輩，閣會繼續生湠落去，親像：
1）.建立「台大病院採用新進藥品臨床試用制度」，需要配合去藥廠查廠，予國內其他的病院亦做為台大病院有通過的新藥才敢綴著進用。因為佇公司食頭路時我捌負責走台大病院，亦捌為公司申請過幾仔擺新藥試驗結果亦攏順序通過，為公司做前鋒，帶著其他病院的進用申請較順序.
2）.重視學生的病院藥局調劑實習訓練.
3）.為社區藥學開路，社區藥局實習是新的課程，至今繼續提升中，規範亦愈來愈完備，提升社區藥師的教學相長.
4）.增設藥學研究所的醫院藥學組，是後來成立臨床藥學研究所的基石.
5）.社會教育以惠民為本.退休後亦參與前藥政處處長王惠珀的「社區教育推展藥學知識計畫」擔任總主持人.鼓勵社區藥局的藥師愛行出藥局，踏入社區親切接觸居民；阮亦攏綴著時勢潮流，進入社區大學、銀髮學苑、村里社區、部落、中小學校、監獄看守所、部隊⋯等等，對無共階層的民眾做用藥安全指導佮教育，亦沓沓仔有少年藥師繼續傳接，予藥師的社會風評提升。
6）.彼時網路猶未真普遍，伊先推動透過廣播電台來放送用藥安全的知識，因為真濟莊跤的民眾攏愛聽廣告買藥、健康食品來食，所以，亦真濟逐縣市公會的藥師不時上電台，講述用藥安全的知識佮予聽眾call in即時回答問題.
看著王光昭教授説：欲踏入學術研究工作者一定愛有興趣.抑無，會當先去實驗室試做看覓.這是真正的腹內話！看著伊佇國外留學順序，上尾仔放棄高薪，轉來台大任教的精神，予人真欽佩敬重.伊亦講：是選擇回國服務？抑是繼續留在國外發斬？叨一種選擇較好？一直到今猶無得到答案.是啦！人生拄著需要選擇的機會真濟，凡事三思而後決定，無後悔，全心投入就可以啦！
看著余秀英教授的人生哲學：不忮不求，永遠正向的思考.是真正會當予咱學習的.
學生時代綴著顧文霞教授去阿里山做生藥採集，行程中拄著戰後頭一次台灣的重大天然災害～八七水災，好佳哉，是有驚無險，安全下山.這嘛予我回想以前大三歇熱時，佮賴博雄學長兩人，受盧教授指示，綴師大生物系的師生去太平山做藥草採集，由800公尺至1800公尺的山頂，坐3擺載材的流籠，起起落落，彼時猶無全線通車的公路，有一工，行過草仔埔時，哇！真濟水蛭（亦叫螞蟥），驚予伊吸著皮膚吸血，行過了後，緊捲起褲管檢查看覓，嘛是一次驚險的經驗.
佇全聯會的活動中，亦時常看著伊活力滿滿，陪著少年藥師群，參與國際事務活動，繼續做國際事務的經驗傳承.
對范進財前輩的印象上深是佇大二歇寒時的藥廠參觀，第一次踏入大藥廠參觀是真歡喜，彼時猶未實施GMP ，毋過，看著生達藥廠品管的儀器設備攏真新，員工真敬業.范董講：伊的名佇過年時去親友兜拜年上受歡迎！因為一入門大聲喝「新春恭喜，進財來拜年」囉！
看著謝汝明學長佇香港的拍拚發展，照顧晚輩後進的精神，亦予人欽佩.想著阮公會佇10年前，由陳世璋前理事長帶領幹部去澳門藥劑師協會參訪，結為兄弟會，做國際交流活動.
看著王在斌董事長的運命人生Keep Learning.感覺佮真濟藥學人真親像！1970年代我的出國留學夢破滅，嘛騎三陽80國民機車走業務，桃園、新竹、苗栗，頭尾3個月，為經銷商拜訪診所藥房；後來換日系製藥會社，一做超過27年，後來1990年代第二次的移民出國夢亦慎重考慮後，將依放棄，損失金額準做是繳人生大學的學費！有影是命運、運命啦！三思而行無反悔就好.
身為醫療團隊的一員，身體健康閣較愛細膩斟酌，注新冠病毒疫苗後，入過ICU後，好好仔反省過去的人生，現時亦學著王董事長每工行一萬步為保健目標，為健康無拍拚行袂用咧！
看著前處長蕭美玲為醫療政策的熱情佮堅持，為全民佮藥界顧著雙贏的政策，非常用心，為兩岸三地的醫藥交流亦盡心盡力，臺灣的立場企予在，交流做你來.回想過去阮公會亦去過上海藥師協會、山東濟南大學藥學院做參訪交流活動.
看著朱茂男前輩的創業精神佮敬業樂業態度，愛有霸氣爭取市場，是想欲創業做頭家的後進通學習.事業發展成功，有心回饋鄉里，做好人文的傳承，是真正確的代誌.
加踅幾仔輪的黃耀欽先進講：計劃趕袂著變化.毋哪佇藥局的經營，其實各行各業攏共款.尤是社區藥局的經營，毋是靠拼價、賣俗就好，愛將社區居民準做親友，提供醫藥保健的專業知識做服務，才會久長，過路客變主顧客，主顧客變死忠的朋友，家庭藥師就是居民上好的用藥諮詢好厝邊啦！
看著急流勇退的方承猷先進講：莫忘初心，Who am I ?真正是現代人需要的生活態度.人生無共階段有無共追求的目標，所以，依照無共坎站，做適當的調整，愛先調整家己的心，才來調整外在的事項；掠著機會前愛先做好準備，做好時間管理是無分什時陣，人生毋是十全十美，毋過亦毋免一直欲搦權、貪財，佇適當時機，會當嫷氣來轉身退場，其實退場是換領域、舞台來發揮，毋是什攏無欲做喔！
千禧年時由公司退場，有機會踏入母語的園區，佇小學做志工教學服務，寫作母語文、詩詞、俳句短歌，會當為母語文的傳湠，盡淡薄仔心力，亦感覺日子真好過啊！
留言列表
