jimmycmlin的部落格

新聞辭典~~~~~反向抵押貸款~~~~~遊子 2009.10.05.
媒體報導：為著對應咱台灣已經進入高齡化社會，為退休老大人生活拍算，
政府想欲推出反向抵押貸款政策，予老大人後半段生活較有保障‧
什麼叫做反向抵押貸款？
反向抵押貸款(Reverse Mortgage)出現佇20世紀的30年代，推出後一直
是已開發國家用來籌備退休金的方法之一，設計的本意是欲以厝養老，並以
帶動養老、保險、房地產等等經濟活動‧簡單講就是：銀行亦是保險公司先
提供貸款予有厝無現金的老大人，幫助伊會使有養老金無煩惱、輕鬆仔來過
日子，等老大人百年了後，伊設定的厝就變成銀行亦是保險公司所有‧
反向抵押貸款實在講起來猶原算是1種保險產品，銀行亦是保險公司透過分
期付款方式，設定投保人的厝地產權，一直到投保人往生為止，銀行亦是保
險公司才收回所設定的厝地，進行後一步的銷售、出租亦是拍賣‧因為是將
厝地貸款方式倒反來做，所以才叫做反向抵押貸款‧
因為各人需要的情形無相共，所以設計出無共的產品，佇美國是由房利美
(Fannie Mae)、美國住房管理局(FHA)、住宅佮都市發展部門(UHD)等等
機構負責實施執行，又閣因為產品設計類似壽險的產品，需要經過精算技術
的支援，所以風險技術要求亦較懸‧毋過，對老大人來講嘛實在傷過複雜，
可能無法度真正瞭解‧佇英國佮澳洲，是設計為終身貸款，由發行機構提供
需要的老大人有通借到錢的通路，予老大人後半段生活較有保障‧
咱台灣想欲綴著做反向抵押貸款是真正好，毋過需要參考已實施國家的優缺
點，予咱台灣的老大人真正後半段生活會使較有保障、有面子‧