jimmycmlin的部落格

新聞辭典~~~~~地聲~~~~~遊子 2009.10.07.
媒體報導：最近全世界真濟所在攏出現水崩山，造成嚴重的災害，
有學者講以地聲來預測水崩山(華語叫土石流)，會使提早知影消息
來走閃逃命‧
什麼是地聲？
因為水崩山(華語叫土石流)是大細粒石頭、沙土、漉糊仔糜佮山水
參濫做伙，閣受到重力作用變成速度真緊的流動物體，大細粒石頭
相挊、衝擊河床、溪岸、石-poh4等等，流動過程佮地面引起震動
，傳出聲音低低的隆隆叫，其中一部份聲音會透過空氣來傳送去遠
的所在，這就是咱所講的地聲‧其實佇大地動發生的同時，因為地
殼層相挊、衝撞，亦會出現地鳴的現象‧
專家講：水崩山造成地面引起振動的頻率大約是10~100Hz(赫茲Hz,
1Hz代表每秒鐘振動1擺)，咱一般人的耳仔會使聽到的範圍是20~
20000Hz，所以，佇水崩山引起的地聲亦是大地動造成的地鳴，咱
一般人會當聽到是無算奇怪啦！
所以，咱如果佇可能發生水崩山的所在，設置地聲偵測器，會使是
固定式的偵測站，亦是裝佇車內變成活動式偵測車，會使提早20分
鐘，予附近的民眾趕緊逃命疏散，減少水崩山造成災害的損失‧毋
過，地聲偵測器對大地動造成的地鳴，可能就無幫助啦！