臺語文：國旗 2022.10.10.
自細漢開始有記持時，會記得每次拄著國定歇睏日，攏會佇隨戶的門頭前插國旗，佇車頭前、縣市政府、公家機關攏插真濟國旗，風吹旗飄揚，規片紅紅滿滿是，看起來亦真有看頭.
讀冊以後，佇國校仔、初中、高中時陣，也有參加慶典活動，典禮結束後是大國旗做上頭前，其他的人手㩮小國旗踅街仔路，雖然，聽著「黨、政、軍」的官員輪流上臺講話心內是感覺怪怪，嗎毋敢講出來，亦是感覺場面鬧熱閣趣味。
大漢以後才知影彼當時是二戰後佇臺灣的戒嚴期（1949/05/19～1987/07/15），因為世界潮流是自由民主制，國內的黨外人士，毋驚關、毋驚死，一擺閣一擺的對抗政府，雖一再爭取失敗，猶原無放棄，佇國內親像民主火種的生湠，加上國外環境的壓力影響，親像隔壁菲律賓總統予全國百姓抗議反對來下台的案例，予前小蔣總統真大啟示佮覺悟，總是決定宣布解除戒嚴令！
看著帶這面國旗走來臺灣的人，佇解嚴後，兩岸漸漸仔拍開互相開放政策，佇咱國內辦理兩岸有交流活動的場合，in7顛倒攏毋敢㩮出來，亦禁止其他的團體㩮出來，有時陣顛倒會出現五星旗啊！抑是過去到中國參與對方辦的活動，四箍輪轉攏有五星旗，毋哪家己這面國旗無看著影，連喙也毋敢講家己國家的名，真正是無聲無影去啊！原本大聲喝「反共抗俄，反攻大陸」，有機會踏入中國的土地，變成恬恬恬，無聲無息者，這敢是歷史的反白？
解嚴後，佇咱國內的節日，沓沓仔、恬恬仔無人佇茨頭前插國旗囉！只賰佇公家機關會當看著插國旗，辦慶祝活動時，過往的「黨、政、軍」官員上台講話亦消失去啦！這才是正常民主社會的現像，只有民選的官員、民意代表上台講話，慶典活動的氣氛，佮以前完全無共款，以前是莊嚴肅穆沉重，後來是歡喜活潑趣味有活力.
國旗雖然是一個國家的圖騰代表，毋過，並毋是攏袂當改，佇全世界的國旗攏共款，美國、紐西蘭、越南⋯攏是有改過的前例；青天白日滿地紅的前身是五色旗啊！只要是經過和諧的全民投票表決後，大多數的選擇結果，逐家攏會當歡喜接受.
現此時的國旗，雖然是二戰後，綴著中華民國來到臺灣，是受著盟軍統帥之令，代表同盟國來接收佮管理臺灣，亦超過一甲子外囉！臺灣在解嚴後，亦經過幾仔次的公開公平選舉，民意真正如流水，亦已經過三擺的政黨輪替，臺灣的公民是目睭金金金，心內各有一支尺，予臺灣的民主制度愈行愈平穩！自由的空氣是真寶貴，真濟無共的議題，攏有無共的看法佮選擇，有時亦會爭甲大細聲，對「國旗」亦是共款，毋過，經過三擺的政黨輪替後，會當講現此時的國旗，是全臺灣共同認同上大的公約數！以後是毋是會按怎改變？上少佇目前為止是維護臺灣安定上大的力量，逐家愛好好仔保惜！
留言列表
