jimmycmlin的部落格

臺語文：簳仔店

現此時三跤步就有一坎便利商店，尤其佇鬧熱所在是日暝攏無歇睏，二十四點鐘光焱焱攏有開，生活中需要的任何物件佮現代人需要的沓沓滴滴服務，是無所不有，應有盡有，予在地人佮出外人攏真利便，雖然價數可能稍寡貴淡薄仔，逐家亦是攏會當接受，真捷去交關.有人會想講古早敢有遮利便的店仔？

其實自古就有類似的簳仔店，是現時便利商店的祖字輩前身，雖然綴著時代進步，社會環境變遷，沓沓仔予新型的便利商店輪汰，漸漸仔由街頭巷尾消散去，毋過，佇市內的舊社區巷仔內、郊外、莊跤所在、山區的部落地區，猶會當看著孤單的簳仔店，顧店的頭家大部分攏是有歲的老大人，猶滿腹充滿著熱情，拍拼服務過路客佮在地居民，予人感覺真親切溫暖.

其實自早到今的簳仔店，毋哪是提供生活必需品、茶米油鹽醬醋茶、囡仔物、四秀仔、會食的物、袂食的用品，予近的遠的人，無論買濟買少，攏真正利便爾爾，遮也是人佮人交陪、談天說地、泡茶開講，互相交換意見、吐出腹內的怨氣、分享喜樂幸福的趣味代誌，算是茨邊隔畢逐家做伙的好所在.

無共地區的簳仔店，也有無共的特色，店內擺設的商品、壁頂的妝點、門框窗仔的花樣，架子頂的藝術品，會當表達出這地方的風俗民情佮藝術文化的精緻.有時會感覺親像是小型博物館、藝術館喔！買賣雙方原則上是現金交易，毋過，手頭不便時，也是會當欠數，看幾時方便才來還數，有月底來還，亦有過年前才總清，總是互相信任，頭家毋驚予人倒數，真正會走路惡意毋還的人是真罕見少數，真正是人言為信！毋免保證、免抵押，這也是現此時咱真欠缺的樸實、老實的傳統啊！