jimmycmlin的部落格

台語文~~~曆日仔~~~遊子   2017.12.28.

過了耶誕節，又是進入新年頭舊年尾的時陣囉！古早每年年尾的上尾仔個月，家家戶戶攏會拜託熟似的公司行號，討一兩個曆日仔轉去茨裡，掛起來佇茨內璧頂，客廳、房間、飯廳、冊房、店口等等，一方面是欣賞嫷風景，一方面是會當註明未來的行程，預定欲做的事誌，亦表示準備迎接新的一年來啦！

曆日仔的型體有百百款：有每工拆一張的大頭仔日曆，有每個月一張的月曆、兩個月一張、參個月一張、半年一張、一年一張的年曆；有大本細本差真濟，有國內、外的嫷風景，藝術品相片、寫大字的書法作品、農林漁牧的產品、天文地理歷史的故事等等，攏是真搶市的曆日仔，因為生活上真實用，過期後猶會當留做紀念佮其他用途‧

另外有一種萬年曆，有用吸鐵做的，亦有用硬紙枋做的，亦有用柴雕刻的，嘛有用瓷仔燒的，後來亦有用電池的電子萬年曆，任何款的萬年曆，攏真耐用耐操，只要mai3摔歹，真正是用久久久喔！所以，佇古董市場有時會看到歷史久遠造型趣味又有特色的萬年曆喔！

現時科技的進步，電腦、平板、智慧型手機仔等等新產品一直改良上市，功能愈來愈濟亦愈來愈好用，ho7大家掛曆日，看曆日仔來做事誌的習慣亦漸漸省起來囉！印刷傳統曆日仔的公司行號亦愈來愈減少，因為來討曆日仔的親朋好友亦愈來愈罕見啦！有時欲主動送人，顛倒閣ho7人嫌鎮位‧減少分送曆日仔的傳統動作，親像亦漸漸ho7人淡忘欲過新曆年的氣氛啦！