台語文~~~搭心~~~遊子 2017.12.26.(附朗讀聲音檔)
俗語講:三百六十行,行行出狀元‧只要專業、熱心佮有愛心,攏是ho7人尊敬的行業‧大眾交通工具的運匠先生,亦是真辛苦,一雙手護著規車人客的安全,長時間坐佇小小空間所在,隨時看內顧外,有時佇車陣中塞車,有時出現意外狀況,有時餓隔頓,有時愛禁尿等等,佇緊張無閒中,猶會當有心來關懷坐車的人客,實在亦無濟啦!
時常坐國光號來往台北,好運時會遇到一位真搭心的少年運匠大的,拄仔駛離開起站時就放送:
歡迎大家來搭乘國光客運,本班次是XX點XX分,由XX開往XX,時間大約XX分鐘‧坐好後,請扭出安全帶綁ho7好喔!
看著有熟似人客亦攏會互相招呼、問好‧
續落來佇每一個車牌仔有人上車時,攏會閣聽到溫馨的聲音:
歹勢啦!ho7恁等傷久囉!(其實大部分是差不多仔時間到)
上車有坎仔,請小心、斟酌、愛細膩喔!
請慢慢仔行去坐位‧
坐好後,為著家己的安全,請扭出安全帶綁ho7好喔!尤其欲上高速公路‧
車佇行的時陣,請毋通起來行轉動‧
車內有提供免費的wifi通上網,坐位邊仔亦有免錢的沖電插座喔!
車內講手機仔時,請較細聲,才袂吵著邊仔的人‧
欲落車的人客,請提早壓鈴仔‧
到後段開始漸漸有人欲落車,伊就講:
感謝啦!免趕緊,寬寬仔落‧
再會啦!
伊的行車平穩,亦袂雄雄踏擋仔來煞車‧
沿途車內亦攏會當欣賞著好聽的音樂‧
遇到搭心的運匠先生,真正ho7人感受到是足快樂的行程啦!
全站熱搜
留言列表