jimmycmlin的部落格

新聞辭典~~~~~麝香豬~~~~~遊子
現此時是囡仔愈生愈少的少子化時代，飼養寵物顛倒是愈來愈時行，天頂飛的，水底泅的
，塗跤爬的、走的等等攏有人飼；親像最近媒體報導到麝香豬，生活日子過著比人較好命
、較享受喔！
麝香豬原產佇中國，後來由日本做品種改良，變成小型的寵物豬，皮膚是白中透紅，部份
有烏色抑是鳥鼠仔色的色塊來相交參，外型看起來親像乳牛的外表，烏白相交參，身軀會
由腺體放出清芳味，連排出的屎尿嘛無臭蒹味、臭肪味，所以才予人叫做麝香豬‧
雖然改良變成小型的寵物豬，拄仔出生時差不多有10外兩重，毋過，佇飼養過程抑準無斬
節，放伊食無停，嘛有可能大到百外公斤，變成大肥豬去喔！伊的壽命上長有15歲，算是
真好飼養的動物，所有人食的物件攏會使提來飼養伊，嘛有予伊食全素食‧
麝香豬的智商有法度達到咱人3~4歲的程度，嘛真正有靈性，會曉表現出喜怒哀樂的表情
，嘛有長期的記憶力，佇生長過程中抑是有受到傷害，無論心理上亦是生理上，伊攏記
(止周) (止周)，所以，一寡仔予人半途棄養的麝香豬，性情會變做較無合群、較焦躁、
暴虐等等‧
所以，綴任何寵物攏共款，有心欲飼養伊，就毋通棄養，絕對毋通”頭仔興興，尾仔冷冷”
！愛有頭有尾才是‧