jimmycmlin的部落格

台語文新聞辭典~~~空茨佮餘屋~~~遊子   200.10.13.

媒體報導：咱全國空茨有86萬外戶，空茨率達到10.35%，準備欲賣的餘屋有5.55萬戶，較舊年共期比較增加懸到45%。按怎來判斷是空茨佮餘屋？

依不動產專業研究來講，以每個月的電錶用電量來判斷，如果每個月的平均用電量無夠60度，算是低度使用的茨，亦是咱所認定的空茨。因為電視佮電冰箱佇現此時已是咱茨內家庭攏有的生活電器用品，親像1台250公升容量的電冰箱，每個月的用電量大約47度；電視每工開機看2點鐘，每個月的用電量大約8-15度，其他的生活電器用品無算在內，咱茨內家庭上少每個月的用電量大約55-62度，所以，以每個月的電錶用電量無夠60度來講，就認定是低度使用的茨‧

毋過，有寡仔起非常久已經無法度蹛人的祖茨、年份久遠想欲等待參加都更的老茨等等，並袂當就認定是空茨，所以，實際的空茨數量應該有閣較頂真的評估判斷標準。

另外講到餘屋是指起好5年以內又準備欲賣的新茨，由低度使用電量的茨，揣出茨齡佇5年內攏無過手，猶原保持第一擺的登記狀況，而且有準備欲賣的茨才算是啦！