臺 語 文：飯 包
疫情消退後，閣有機會來畚箕湖（後來改名為奮起湖）行踏，行佇老街巷仔內，看著以早蹛過的旅館外壁，大大的看板寫著懷念的滋味～「奮起湖便當」，時間也中晝囉！亦綴人來排隊，樓跤座位早就客滿，阮就行樓梯去茨尾頂，看著食中晝的遊客猶原真濟，毋過，茨尾頂空氣流通品質好，又會當欣賞著較遠較嫷的景緻.
看著外面的茨尾頂，雲霧繚繞，綴著風吹的方向，一陣一陣飄浮徙步，予人感覺身佇雲內，突然間聽到火車的嗶仔聲，穿過空中的雲霧，猶是刺耳音樂聲，過一沓仔久，亦看著對爿的山腰樹林區，有一列紅色車廂的火車行過，萬青中間一巡紅，規個畫面是真正嫷！無想著簡單食一個懷念的飯包，又閣會當享受著大飯店所無的氣氛佮自然的景色.
掀開鐵盒仔的飯包，菜色真澎派，有大塊排骨肉佮大支雞腿通選擇，筍絲、滷卵、高山青菜⋯，頭家亦提供免錢的海菜湯，價數是綴著錢變薄來調整，毋過內容真實在，無偷工減料，算是CP值讚的一頓啦！
喙內食著飯包的好料，心內想著一甲子前，讀初中時的影像⋯，每工阿母天未光就起床為阮攢中晝的飯包，攏真用心予阮每工有無共的菜色，滷肉、菜脯卵、煎魚仔⋯，予阮食會飽佮有營養，色香味攏顧著，佇班上的同學間也會互相比評，相換菜色，分享無共阿母的滋味.食中晝是歡樂的氣氛.其實並毋是每一個人攏遮好命，有阿母來攢飯包.
印象上深的是彼時的班長，洪班頭是寄蹛佇親情的茨內，每工早起攏愛家己由大灶滾泔糜仔時，用鱟桸來撈出較乾的飯粒裝入飯包盒仔內，菜色亦攏真簡省，醬鹹、菜脯、魚脯仔，真罕看有肉類、卵包、大尾魚仔，同學間有時也會分張家己的飯包菜予伊，表現著同學間的感情是真正好，有溫暖的感覺.
有時陣同學相招，佇第三節歇睏時就將飯包食完，為著想欲利用中晝歇睏時間較長，同齊去運動場踢跤球、運動、去校園邊仔的虎頭山山坪仔，揣野生的刺波（現時講草莓）、樹林區覕相揣、鑽山洞，磅空內烏密密，會當看著壁頂有密婆、青竹絲、大隻蜈蚣、樹蛙仔⋯，彼時的虎頭山是猶保持原始的面貌，完全無人工化的建設，是真好耍的所在，亦是後來同學間真懷念的時段。
飯包佇人生無共階段有無共的懷念，過往答答滴滴的回憶親像昨昏的代誌，其實已經一甲子囉！
留言列表
