臺語文：帝王柑
臺灣是果子仔的天堂，因為處佇亞熱帶所在，溫帶、熱帶的果子亦攏有法度種作生產；尤其咱臺灣的農產品改良品種的技術，一直有進展，真濟農產品攏有新品種，口感、產量、生產期、外形、甜蜜度⋯等等，攏予食過的人非常呵咾甲會觸舌，好滋味好名聲亦透甲全世界.
寒天時是柑仔類的大出時陣，細漢時只知影有椪柑、桶柑、年柑、金桔仔、柳丁等爾爾，後來才發現有真濟新名詞出來，美人柑、虎頭柑、蜜柑、沙糖橘、紅肉柳丁、珍珠柑、肚臍丁、血柑、茂谷柑、佛利蒙柑、三寶柑、天王柑、帝王柑⋯，實在有夠濟，無法度攏記著.
踮遮著來講最近較新品種的帝王柑，帝王柑的品種可能是來自清朝時期的山東貢柑，每年攏會採收進貢朝廷；大約4年前才由彰化溪州的鄉民引入臺灣以有機方式種作，結出來果是甘甜、皮薄，外型比一般的柳丁較細粒，汁濟佮清甜，口感幼緻，也經過醫學大學中醫師鑑定，帝王柑性溫和，連驚冷會咳嗽的人、哺檳榔的人也攏會當安心仔來食.
由中部地區沓沓仔推廣到南部北部地區攏有農民種作，兩年前亦綴著楊小姐的團，去到苗栗三灣山區的柑仔園，規片的柑仔掛在樹欉頂，大小粒、黃色的、青色的，吊佇樹椏頂，生甲密密密，咱外行是看袂出柳丁、帝王柑按怎分？亦是愛頭家來説明後，逐個人才開始現地親手挽帝王柑，現場食毋驚，隨你食到飽，主人家只交待：食歡喜，偌濟攏無要緊，只是毋通拍損，傷細粒的mai3挽，毋通咬ㄧ喙賰的就放sak ，想欲挽轉去食，隨你揀入袋子，秤斤是一斤五十箍.
柑仔園內笑聲不斷，揣背景擺姿勢來翕像的、挽來享受看覓的，哇！真正是有夠好食啦！手夯鉸剪真細膩，目睭金金相柑仔欉，看著甲意的，緊剪落來，大人囡仔大大小小，攏感覺真趣味.秤重亦愛排隊，三斤五斤算細跤，十斤二十斤的亦有，頭家講：買濟的人客，會當裝紙箱子，用宅配運送到府上，免提甲大袋小袋，輕鬆濟囉！
有出國遊覽佚佗過的人攏知影，比較起來，咱臺灣真正是果子仔的天堂啊！
留言列表
