臺語文：車掌
現此時科技進步，出門坐車真利便，細張卡片紥著，毋管是坐市內公車、跨縣市客運、國光客運、短途電車、計程車、捷運⋯等等，只要上車時予感應機嗶一聲，落車閣予嗶一聲就可以。毋免先去排隊買票，亦毋免攢銀角仔、紙票，省力省時又省工。
越頭想著半世紀前，共款出門坐車，一般汽車的車內除了司機以外，攏一定有一位綴車的姑娘仔，咱攏叫伊車掌小姐。短途的人客上車時，伊負責收票、剪月票、驗票證（有特別身份需要驗證件才會當買優待票抑是免票）；長途的人客，佇半途中上車後，愛提錢來買票，伊著愛揣票、收錢佮找錢，銀兩的出入愛真細膩，一屑仔著袂當重耽去；路途中車身是搖來晃去，企袂穩，亦實在真無閒；欲倚中途的車牌仔站進前，愛提醒喝聲，請欲落車的人客先準備好；雖然是真無閒，毋過逐家互相客氣尊重，每一班次攏站站平安無代誌，每一個人攏順序到欲去的所在，伊佮司機大哥攏歡喜，咱逐家亦歡喜、感謝。
另外佇長長幾仔節的火車內，亦是有服務人員，查埔查某攏有，列車長是負責驗票、補票佮掠走票的人來補票罰錢；車掌是負責倒茶水、賣便當、賣報紙雜誌佮飲料、四秀仔等等，佇普通車佮平快車內，拄著上下班時間、年節時仔，車廂內是擠甲密密密，sak 著細臺販賣車仔，欲通過狹狹的通道，有影是真無簡單啊！會記著讀高中通車時，有時會聽著大聲喝「滾水！燒滾水、燒滾水喔⋯⋯」企佇通道的人，緊閃邊仔貼著邊仔人，抑無，予燒滾水的茶鈷燙到，是無底討啊！
抑是較高級的車種，親像火車的觀光號、光華號、莒光號，公路局的金馬號，攏是招考入去的快車小姐，佇車內提供親切服務，項目佮普通車的相共，只是品質閣較好，予人感覺是溫馨的享受；hit 當時的光華號是臺灣速度尚緊的火車，臺北至高雄，中途只停臺中站爾爾，部分車次是直達車，連臺中亦無歇，上車座位後，每一個人攏免費分著一盒西式的餐盒做點心，是到今唯一的特色！予人懷念久久。
對照著今昔的感覺，現時是利便、省時、省力佮省工，毋過，著是欠缺人情味，時代社會環境的變遷，總是有一好無兩好啦！
（借用網路相片）
留言列表
